Жыхары Гомеля абураюцца масавым адстрэлам бяздомных жывёлаў

Жыхары Гомеля абураюцца жорсткім абыходжаннем з бяздомнымі жывёламі. Зоаабаронцы масава пішуць пра забойствы. Пункт часовага ўтрымання бяздомных жывёлаў перапоўнены. У сацсетках з'явіліся звароты да новага старшыні Гомельскага гарвыканкама Руслана Пархамовіча з просьбай спыніць заганную практыку, заўважыў "Флагшток".

Як паведамлялася раней, у Гомелі адбыліся некалькі нападаў бадзяжных сабак на людзей. Вядома пра дваіх пацярпелых дзяцей. Пасля гэтага Пархамовіч загадаў адлавіць бяздомных сабак.

Адна з зоаабаронцаў у відэазвароце кажа, што жорсткі адлоў і масавыя забойствы катоў і сабак адбываюцца па ўсёй Гомельскай вобласці. У тым ліку супраць жывёлаў выкарыстоўваюць атруту, ад якой яны доўга і пакутліва гінуць.

Таксама валанцёры заклікаюць да гуманнага адлову, які не наносіць маральных пакутаў відавочцам такіх дзеянняў. Зоаабаронцы кажуць, што сведкамі адстрэлу становяцца малыя дзеці, для якіх такія крывавыя сцэны могуць стаць даўгачаснай траўмай.