Ад спёкі патрэскаліся трасы з Мінска на Віцебск і Мікашэвічы

Траса М3 Мінск-Віцебск недалёка ад Раўбічаў не вытрымала нядаўняй анамальнай спякоты: пакрыццё трэснула і стала няроўным.

Прычыны гэтага ў каментары БЕЛТА патлумачыў начальнік упраўлення вытворчасці работ і ўтрымання дарожнай сеткі РУП "Мінскаўтадар-цэнтр" Дзмітрый Дземідовіч:

"Калі асфальтабетон пачынае размякчацца і цяжкія машыны пачынаюць набіваць каляіну, то з цэментабетоннымі пакрыццямі сітуацыя іншая. Траса М3 была пабудаваная яшчэ ў 1989 годзе паводле савецкіх нормаў. Тады не было прадугледжана ніякіх мер ад вертыкальнага зрушэння пліт. Выкладзены бетон 24 сантыметры, у ім прарэзаны швы — і ўсё. Пры награванні маналітныя пліты пашыраюцца, і калі ўчастак зафіксаваны паміж будынкамі, напружанне назапашваецца, праз што пліты проста паднімаюцца ўгору".

На сучасных трасах, запэўнівае Дземідовіч, такіх дэфектаў няма.

Ён паведаміў, што за 30 чэрвеня — 1 ліпеня два аналагічныя выпадкі зафіксавалі таксама на дарозе Р23 Мінск — Мікашэвічы.

Прадстаўнік дарожнікаў заявіў, што непаладкі ліквідуюць аператыўна — цягам дзвюх-трох гадзін пасля паступлення інфармацыі. Узнятыя пліты выразаюць, а на іх месца ставяць латку з асфальтабетону.

Калі аўтамабіль атрымаў пашкоджанні ад уздыбленай пліты, прадугледжаная кампенсацыя. Паводле Дземідовіча, звычайна максімальны ўрон абмяжоўваецца пабітым дыскам ці адарваным бамперам, а яго кампенсуе страхавая кампанія.