Польскую фірму аштрафавалі за пастаўку люксавых аўто ў Расію праз Беларусь

20 млн злотых, ці прыкладна 5,4 млн долараў — такі штраф заплаціць кампанія з Сілезскага ваяводства Польшчы. Фірму пакаралі за абыход санкцый ЕС і пастаўку люксавых аўтамабіляў у Расію праз Беларусь, піша выданне MOST.

Праверка пракуратуры выявіла, што з 1 студзеня па 23 чэрвеня 2023 года польская фірма прадала за межы ЕС 177 аўтамабіляў і адзін матацыкл. Кошт кожнага транспартнага сродку перавышаў 50 тысяч еўра, а разам яны каштавалі больш за 19 млн еўра. Гэта азначае, што яны лічацца люксавымі транспартнымі сродкамі, ці прадметамі раскошы, пастаўкі якіх у РФ знаходзяцца пад санкцыямі.

Машыны вывозіліся праз Беларусь, а адтуль траплялі ў Расію, дзе і былі зарэгістраваныя.

На кампанію наклалі максімальна магчымы штраф. Гэта абгрунтавалі маштабамі схемы і абазнанасцю прадпрымальніка ў тым, што "тавар у канчатковым выніку паступае расійскаму пакупніку".

Дарэчы, нядаўна на такую ж суму аштрафавалі кампанію беларусаў з Малапольскага ваяводства. У 2022-2023 гадах іх фірма паставіла ў Расію праз Літву і Беларусь больш за 100 аўтамабіляў агульным коштам больш як 49 млн злотых. Прычым паводле дакументаў машыны паступалі ў трэція краіны.