У ЗША арыштавалі цяжкахворую беларуску, якая падала заяву на прытулак
Кацярына Бартко / Дзмітрый Шышоў
У ЗША міграцыйная служба ICE затрымала беларуску Кацярыну Бартко, якая папрасіла палітычнага прытулку. Жанчына мае цяжкае захворванне і залежыць ад лекаў пасля аперацыі на шчытападобнай залозе, перадае "Белсат".
33-гадовая Кацярына Бартко пакінула Беларусь пасля ўдзелу ў пратэстах 2020 года. Яна актывістка BYPOL, таму вярнуцца ў краіну яна не можа пад пагрозай палітычнага пераследу, расказаў яе хлопец Дзмітрый Шылаў журналістам.
У ЗША беларуска прыехала легальна 5 сакавіка 2022 года паводле студэнцкай візы і падала заяву на палітычны прытулак. Сёлета 21 траўня яе затрымалі міграцыйныя службы: ад беларускі патрабавалі пакінуць ЗША для змены статусу праз консульства. Пазней патрабаванне змякчылі але Кацярына ўжо трапіла ў сістэму ICE.
У 2014-м Кацярыне выдалілі шчытападобную і парашчытападобную залозы падчас анкалагічнай аперацыі. Цяпер яна мае пажыццёвы дыягназ — хранічную гіпакальцыемію – і павінна штодня піць лекі для падтрымання ўзроўню кальцыю ў крыві. Дзмітрый кажа, што пасля затрымання ў яе лекі скончыліся, і за некалькі дзён яе тройчы дастаўлялі ў шпіталь.
Беларуску некалькі разоў пераводзілі ў розныя ізалятары. У іміграцыйнай турме ў Канзасе ў яе зноў забралі лекі, і каля трох дзён Кацярына заставалася без неабходнага лячэння. Дзмітрый кажа, што звяртаўся ў дзяржаўныя органы і офіс кангрэсвумен. Пасля гэтага работнікі ICE, паводле яго, заявілі, быццам у Кацярыны няма праблемаў са здароўем і яна не просіць дапамогі. Пасля гэтага ў яе, сцвярджае Дзмітрый, забралі рэшткі асабістых лекаў.
Пазней Кацярыне врнулі доступ да лекаў, але меддапамога была недастатковай. Паводле Дзмітрыя, абследаванні выявілі дадатковыя ўтварэнні, у тым ліку кісту шышкападобнай залозы і кісту правага яечніка, а кансультацыю анколага яна яшчэ не атрымала.
У траўні лідарка суполкі беларусаў Сан-Францыска Надзея Нортан казала, што ў амерыканскіх іміграцыйных турмах знаходзяцца каля сотні грамадзянаў Беларусі. Пры гэтым ніводнага пацверджанага факту высылкі пакуль што няма.
