Да беларускага палітуцекача, які жыве ў Тбілісі без дакументаў, прыйшла паліцыя

16 ліпеня памежная паліцыя Грузіі прыйшла дадому да беларускага праваабаронцы Рамана Кісляка, які жыве ў Тбілісі. На палітуцекача склалі пратакол за перабыванне ў краіне без дакументаў.

У каментары выданню "Позірк" Кісляк расказаў, што паліцыя шукала людзей, якія нелегальна знаходзяцца на тэрыторыі краіны: "Сказалі: мы зараз праверым. Калі загадаюць вас даставіць, мы надзенем на вас кайданкі і адвязем у Дэпартамент міграцыі [МУС]. Яны былі ўзброеныя, з пісталетамі. Патэлефанавалі ў дэпартамент і вырашылі, каб я сам з’явіўся 21 ліпеня".

Як і вялікая частка беларускіх палітуцекачоў Кісляк не можа памяняць пашпарт, які скончыўся ў лютым 2024 года. Часовая даведка, выдадзеная мясцовымі ўладамі, таксама састарэла, новую праваабаронцу не далі. Тым не менш ён знаходзіцца пад часовымі мерамі бяспекі паводле рашэння Камітэта ААН па правах чалавека, які раней разгледзеў яго скаргу на адмову грузінскіх уладаў у прытулку.

Праваабаронца пасля візіту паліцыі накіраваў скаргу на дзеянні Дэпартамента міграцыі, які, на яго думку, з кастрычніка 2025 года ігнаруе звароты наконт легалізацыі. 21 ліпеня Кісляк плануе наведаць дэпартамент, але не выключае, што яго затрымаюць.

Сёлета ў сакавіку грузінскія ўлады паўторна дэ-факта адмовілі Кісляку ў прытулку.