Ва Украіне загінуў амапавец, які ўдзельнічаў у задушэнні пратэстаў у Беларусі
Аляксандр Лугоўскі / фота з сацсетак
На вайне ва Украіне загінуў былы мінскі АМАПавец, які ўдзельнічаў у задушэнні пратэстаў 2020-га.
Аляксандр Лугоўскі ваяваў на баку Расіі і памёр у першы год поўнамаштабнага ўварвання, за дзень да свайго 32-годдзя, піша @vitebsk_info.
Даныя Лугоўскага знайшліся ў картцы ўліку загінулых, якія запаўняе "Медыязона". Датай нараджэння ўказанае 19 снежня 1990 года. У характарыстыках пазначана, што "замежнік" і мае дачыненне да прыватнай вайсковай кампаніі.
Чалавек з такімі персанальнымі данымі ёсць у базах, якія складаліся пасля пратэстаў 2020 года. Там пазначана, што Аляксандр Лугоўскі працаваў міліцыянтам-кіроўцам 1-й роты 3-га ўзвода АМАП ГУУС Мінгарвыканкама. А таксама — што ён прымаў актыўны ўдзел у задушэнні мірных акцый пратэсту, а за асаблівую жорсткасць і імкненне выслужыцца атрымаў заахвочванне ад начальства.
Дата смерці Лугоўскага — 18 снежня 2022 года.
