Беларуска, якую затрымалі ў Італіі па запыце Мінска, вярнулася да сям'і ў Польшчу

Пасля трох з паловай месяцаў вымушанага знаходжання ў Італіі беларуска Карына Зданевіч-Спыхальска вярнулася да сям'і ў Польшчу. Як паведамлялася раней, яе затрымлівалі паводле ордара Інтэрпала, куды звярнулася беларуская пракуратура.

У гутарцы з выданнем MOST беларуска расказала, што не першы раз сутыкаецца з гэтай праблемай. У лютым 2024 года на памежным кантролі на Балі да яе ўзніклі пытанні. "Восем гадзін у аэрапорце я прачакала, але мяне развярнулі — не пусцілі на Балі", — згадвае Карына.

Потым у яе з'явілася праблема з уездам у Турцыю, якую раней жанчына спакойна наведвала. У траўні 2025 года праз мяжу прапусцілі мужа і дзяцей, але не яе.

Таксама яе затрымлівалі ў Польшчы. Карына кажа, што сама выклікала паліцыю з пэўных акалічнасцяў. Нарад развязаў праблему, але праз пяць хвілін паліцыянты вярнуліся. Яны спыталіся, ці ведае жанчына, што яе шукаюць праз Інтэрпал. Пасля гэтага яе забралі яе з сабой.

"Мяне дапытаў пракурор. Спытаў, з чым звязаны запыт [Беларусі]. Я сказала, што ён, напэўна, палітычны. Тады мяне папярэдзілі, каб не ездзіла ў Беларусь. І сказалі: "Будзьце асцярожныя ў іншых краінах". Праз 15 хвілін мяне выпусцілі", — згадвае Карына.

Да гэтага года ў Зданевіч-Спыхальскай не было праблем пры падарожжы ў межах Шэнгегскай зоны. Летась яна сем разоў была ў Парыжы, два гады таму прыязджала ў Італію. Сёлета ў Італію яна таксама прыехала без праблем, а пры выездзе падчас сканавання квітка ў аэрапорце спрацавала сістэма — і жанчыну затрымалі.

Першыя пяць дзён пасля арышту Карына правяла ў турме ў Бергама. Потым яе адпусцілі пад абавязацельства яўкі. Тры з паловай месяцы яна жыла ў знаёмых. Пазней Карыне дазволілі вярнуцца ў Польшчу, але яна ўсё яшчэ абавязаная прыязджаць у Італію на слуханні сваёй справы.

Беларускія ўлады вінаваяць Зданевіч-Спыхальску ў наўмысным банкруцтве фірмы ў 2017 годзе. Яна кажа, што ў дакументах значыцца, быццам яна павінна банку 60 тысяч еўра, хаця раней пісалі пра 6 тысяч еўра.

Жанчына тлумачыць, што яе кампанія сышла ў банкруцтва, калі сама яна жыла ўжо ў Польшчы. Справай займаліся беларускія адвакаты. "Цяпер я разумею, што павінна была атрымаць нейкі канчатковы дакумент аб банкруцтве. Я яго не атрымала. Але іншыя адвакаты мне казалі, што ён ёсць", — кажа Карына.

А запыт ад беларускіх уладаў з'явіўся толькі ў верасні 2020-га. Карына звязвае гэта са сваёй актыўнасцю пасля прэзідэнцкіх выбараў, калі яна падтрымала пратэсты. Тады яна выходзіла на мітынгі ў Варшаве, а таксама размяшчала пасты ў сябе ў сацсетках.