Беларуску затрымалі ў Італіі паводле запыту пракуратуры Брэста

У Італіі затрымалі 34-гадовую беларуску Карыну Зданевіч-Спыхальску. Гэта адбылося яшчэ 1 лютага ў аэрапорце Орыа-аль-Серыа, адразу па яе прылёце ў краіну, піша італьянская газета Il Giorno.

Ордар на арышт Карыны яшчэ ў 2021 годзе выдаў намеснік пракурора Брэста. На радзіме яе вінавацяць у "наўмыснай неплацежаздольнасці" ці банкруцтве ў 2017-2018 гадах. Беларусь перадала запыт на яе вышук у Інтэрпал.

Сама беларуска заяўляе, што справа была сфабрыкаваная. На думку Карыны, улады яе пераследуюць за ўдзел у акцыях каля беларускай амбасады ў Варшаве ў падтрымку Святланы Ціханоўскай пасля прэзідэнцкіх выбараў у 2020 годзе. Яна адзначае, што ордар на арышт быў выдадзены адразу пасля тых акцыяў. Апазнаць яе маглі па фатаздымках з акцый.

Зданевіч-Спыхальска застаецца ў Італіі пад абавязальніцтвам аб яўцы і пакуль жыве ў знаёмых у Мілане. Справу разглядае апеляцыйны суд Брэшыі. Пракуратура выступае супраць экстрадыцыі жанчыны. Такое хадайніцтва падавала польскае консульства, якое папярэджвала пра небяспеку пераследу ў Беларусі. Судовае пасяджэнне па гэтай справе адбудзецца ў чэрвені.

Народная амбасада Беларусі ў Італіі кажа, што трымае сувязь з нашай суайчынніцай з дня затрымання. Таксама інфармацыя перададзеная ў юрыдычны аддзел Офіса Святланы Ціханоўскай, што займаецца кейсамі, звязанымі з Інтэрпалам.

Адвакат Карыны выказвае надзею на пазітыўны вынік разгляду справы. Ён заклікае выдаліць запыт на вышук Карыны з Інтэрпалу, каб падобныя выпадкі не паўтараліся.