Ціханоўская падтрымала ідэю ўсталяваць бел-чырвона-белы сцяг на Грунвальдскім полі

Святлана Ціханоўская падтрымала грамадскую ініцыятыву па ўсталяванні бел-чырвона-белага сцяга на месцы Грунвальдскай бітвы.

Лідарка беларускіх дэмакратычных сілаў накіравала адпаведныя лісты маршалку Вармінска-Мазурскага ваяводства і кіраўніцтву Музея Грунвальдскай бітвы, паведамляе яе прэс-служба. Пад зваротам за ўсталяванне бел-чырвона-беларга беларускгаа сцяга сабрана ўжо больш за тысячу подпісаў беларускіх палітыкаў, культурных і грамадскіх дзеячаў, гісторыкаў і актывістаў.

У сваім лісце Ціханоўская піша, што Грунвальдская бітва — супольная спадчына палякаў, беларусаў, літоўцаў, украінцаў і іншых народаў, якія разам абаранялі свабоду. Для беларусаў гэта адна з ключавых дат нацыянальнай гісторыі, а бел-чырвона-белы сцяг сімвалізуе гістарычную пераемнасць беларускай дзяржаўнасці і сучасную барацьбу за свабоду.

Яна нагадвае, што на месца Грунвальдскай бітвы штогод прыязджаюць сотні беларусаў, каб ушанаваць гэтую перамогу. "На жаль, у самой Беларусі ўлады мэтанакіравана выціскаюць памяць пра Грунвальдскую бітву і замяняюць яе расійскімі гістарычнымі наратывамі. Таму так важна захаваць гэтае месца як сімвал нашай агульнай еўрапейскай гісторыі", — дадае Ціханоўская.

Чарговая гадавіна Грунвальдскай бітвы будзе адзначацца заўтра, 15 ліпеня. У Офісе Ціханоўскай разумеюць, што сёлета рэалізаваць такую ініцыятыву ўжо практычна немагчыма, таму спадзяюцца, што арганізатары разгледзяць гэтую прапанову пры падрыхтоўцы наступных угодкаў.

Цяпер на полі пад Грунвальдам усталяваныя польскі, літоўскі і ўкраінскі сцягі.