У Літве выявілі яшчэ адзін падземны ход з тэрыторыі Беларусі
Мігранты трапілі з Беларусі ў Літву праз падземны ход / VSAT
Літоўскія памежнікі затрымалі ў Шальчынінкайскім раёне 38 мігрантаў, якія нелегальна трапілі на тэрыторыю краіны. 36 мужчын і 2 жанчыны прабраліся праз мяжу з Беларусі па падземным ходзе, паведамляе прэс-служба ведамства.
Мігрантаў, якія прайшлі падземным ходам, затрымалі ўвечары ў панядзелак памежныя патрулі пры дапамозе кінолагаў са службовымі сабакамі і байцоў памежнага спецназу. Тэрыторыю абследавалі з дапамогай верталёта "Eurocopter" і беспілотнікаў.
Паведамляецца, што памежнікі затрымалі ўсіх мігрантаў, якія прабраліся падземным ходам. 36 з іх назваліся грамадзянамі Афганістана, пры гэтым дакументы былі толькі ў 23 чалавек. Яшчэ двое замежнікаў назваліся грамадзянамі Ірана, але ў іх не было дакументаў.
Мігрантаў адправілі назад, прапанаваўшы ім перад гэтым гуманітарныя пакеты з ежай і рэчамі для адпачынку на прыродзе. Прынялі дапамогу толькі чатыры чалавекі.
Сёлета гэта ўжо як мінімум трэці раз, калі ў Літве ловяць мігрантаў, якія прабіраюцца з тэрыторыі Беларусі праз падземныя хады.
