Сталі вядомыя прыбыткі і выдаткі хакейнага клуба сярэдняга сына Лукашэнкі

Аматарская хакейная каманда "Шчыт", за якую гуляе сярэдні сын Лукашэнкі, атрымлівае ад невядомых спонсараў сотні тысяч еўра штогод. Справаздачу пра паступленне і расходаванне сродкаў каманды Дзмітрыя Лукашэнкі вывучылі журналісты-расследвальнікі выдання "Бюро".

У 2022 годзе на рахунках хакейнага клуба "Шчыт" аказалася 746 тысяч рублёў (271 тысяча еўра). У 2023 годзе — 586 тысяч рублёў (180,5 тысячы еўра). У 2024-м – 433,5 тысячы рублёў (123,5 тысячы еўра). У 2025-м — 514 тысяч рублёў (148,6 тысячы еўра).

Агулам за чатыры гады журналісты налічылі на балансе аматарскай каманды Дзмітрыя Лукашэнкі амаль 2,3 мільёна рублёў, або каля 724 тысяч еўра. У дакументах пазначана, што гэта бясплатная спонсарская дапамога. Але імёны гэтых спонсараў не называюцца.

Ільвіную долю выдаткаў клуба складае навучальна-трэніровачная дзейнасць, падрыхтоўка і ўдзел каманд у міжнародных турнірах па хакеі, набыццё інвентару і экіпіроўкі.

Частка сродкаў ідзе на аплату арганізацыйных і гаспадарчых расходаў (інфармацыйныя кампаніі, паслугі банкаў, камандзіровачныя расходы). Акрамя таго клуб і сам выдаткоўвае грошы на спонсарскую дапамогу (за два гады было вылучана 71,4 тысячы рублёў).

Акрамя таго "Шчыт" плаціць заробкі двум супрацоўнікам.

Першы з іх — Яўген Кукушкін. У нулявых ён быў інспектарам у Камітэце па каштоўных паперах пры ўрадзе. У 2002-м супрацоўнікі КДБ затрымалі яго за спробу прадаць расійскім бізнесоўцам ваенную дзяржаўную таямніцу пра дзейнасць абароннага прадпрыемства "Пеленг". Кукушкіну прысудзілі ўмоўны тэрмін.

У "Шчыце" ён выконвае абавязкі старшыні савета клуба — гэта значыць, фактычна з'яўляецца кіраўніком. Таксама Кукушкін атрымлівае 0,25 стаўкі як трэнер з месячным акладам у 1860,6 рубля.

Другі штатны супрацоўнік — Аляксандр Жукавец, які на пачатку 2010-х працаваў дзяржаўным трэнерам па хакеі на траве Мінспорту. У штаце хакейнага клуба ён пазначаны як трэнер-адміністратар на 0,25 стаўкі са сціплым акладам у 278,25 рубля.