Лукашэнка атрымаў новыя прапановы з ЗША і перадаў "добрыя пажаданні" Коўлу і ягонай жонцы
Джон Коўл і Аляксандр Лукашэнка / president.gov.by
Нядрэннымі назваў цяперашнія адносіны Мінска і Вашынгтона Аляксандр Лукашэнка. На гэтую тэму ён выказаўся, прымаючы з дакладам пастаяннага прадстаўніка Беларусі ў ААН Валянціна Рыбакова.
"Сітуацыя, якая складваецца ў нашых адносінах, і асабліва дынаміка і перспектывы — нядрэнныя", — цытуе БЕЛТА словы Лукашэнкі.
Ён даручыў Рыбакову займацца наладжваннем беларуска-амерыканскіх адносінаў. "У шчыльным кантакце працуеш з Джонам Коўлам. Перадай яму самыя добрыя пажаданні і яго цудоўнай жонцы", — заявіў Лукашэнка.
Коўл з'яўляецца спецпрадстаўніком прэзідэнта ЗША па Беларусі. Яго візіты ў Мінск цягам апошніх месяцаў пастаянна суправаджаліся вызваленнем беларускіх палітвязняў. У абмен на гэта Штаты аслаблялі санкцыі супраць рэжыму Лукашэнкі.
Пасля сустрэчы з Лукашэнкам Рыбакоў расказаў, што перадаў яму новыя прапановы ад кіраўніцтва Злучаных Штатаў: "Літаральна некалькі дзён таму былі сфармуляваныя чарговыя пэўныя прапановы ЗША на наш адрас".
