Дом, які будавалі для шматдзетных сем'яў, засяляюць ахоўнікі Лукашэнкі

У 2025 годзе ў Мінску скончылі будаваць новы квартал шматпавярховак. Гарадскія ўлады заяўлялі, што гэта будзе жыллё для шматдзетных сем'яў, якія стаяць у чарзе на паляпшэнне жыллёвых умоваў. Аднак выданне "Зеркало" даведалася, што адзін з дамоў засялілі некалькі дзясяткаў супрацоўнікаў Службы бяспекі Лукашэнкі, у тым ліку яго асабістыя целаахоўнікі.

У доме 74 па вуліцы Валгаградскай больш за палову кватэр занялі жыхары, звязаныя са Службай бяспекі Лукашэнкі. Два дзясяткі памяшканняў афіцыйна знаходзяцца ў аператыўным кіраванні гэтай структуры, а каля сарака новых уладальнікаў жылля фігуравалі ва ўцечках як супрацоўнікі аховы.

Журналісты "Зеркала" знайшлі сярод уладальнікаў новых кватэр Іллю Пагуляева, які шмат разоў трапляў на фота з мерапрыемстваў з удзелам Лукашэнкі. У верасні 2025-га ён сядзеў перад Лукашэнка падчас фіналу конкурсу "Міс Беларусь".

Ахоўнік Уладзіслаў Кавалеўскі прысутнічаў побач з Лукашэнкам падчас яго візіту ў Бішкек. А экс-міліцыянт Андрэй Пузырэнка суправаджаў Лукашэнку ў студзені 2026 года падчас паездкі ў царкву ў Раўбічах.

Трохпакаёўку атрымаў целаахоўнік Арцём Сабяшчанскі, які некалькі разоў трапляў на фота пры суправаджэнні Мікалая Лукашэнкі. Ягоны сусед Аляксандр Пашкевіч быў заўважаны на мерапрыемствах з удзелам старшыні Палаты прадстаўнікоў Ігара Сергеенкі, а Раман Карачан суправаджаў Рамана Галоўчанку падчас паездкі ў Іран.

Аднак да службы бяспекі перайшоў не ўвесь 16-павярховы дом. Некаторыя яго жыхары, піша выданне, фігуравалі ва ўцечках у сувязі са службай у структурах МУС. Таксама сярод насельнікаў дома знайшліся імёны некалькіх супрацоўнікаў Мінгарвыканкама. Пяць кватэр знаходзяцца ў кіраванні Аператыўна-аналітычнага цэнтра пры Лукашэнку (ААЦ).

Таксама там могуць жыць звычайныя людзі, не звязаныя з дзяржслужбай.

Новыя кватэры не былі бясплатнымі, аднак маглі каштаваць значна танней за рынкавы кошт для Мінска. Цану квадратнага метра ў "сілавым" доме №74 афіцыйна не публікавалі. Аднак жыхары суседніх шматпавярховак таго ж забудоўшчыка казалі журналістам, што адзін квадратны метр каштаваў 2100−2300 рублёў.

Паводле інфармацыі "Зеркала", многія навасёлы са Службы бяспекі афармлялі льготныя крэдыты ад "Беларусбанка" на 20 гадоў на суму ад 50 да 90 тысяч рублёў. Кватэры, набытыя на такіх умовах, нельга прадаваць да пагашэння пазычанасці. А тыя, хто купляў жыллё без крэдыту, маюць права выставіць яго на продаж. У інтэрнэце ўжо з'явіліся адзінкавыя абвесткі аб перапродажы кватэр у доме №74. У іх называюцца цэны ў 5400 і 6460 рублёў за метр.

Паводле звестак журналістаў, так прадаў трохпакаёвую кватэру ў новабудоўлі на Валгаградскай Аляксей Шкут са Службы бяспекі. У студзені 2026‑га яго сям’я аформіла трохпакаёвую кватэру, а ў лютым прадала яе. Ужо ў сакавіку сям’я купіла ўчастак і дом у Дзяржынскім раёне.