Райвыканкамы Гомельшчыны масава закупляюць тактычныя аптэчкі — "Флагшток"
Старшыня аблвыканкама Іван Крупко (справа) на зборах тэрабароны ў Рагачове ў 2024-м / "Свабоднае слова"
Райвыканкамы ў Гомельскай вобласці закупляюць індывідуальныя тактычныя аптэчкі. Пра гэта піша мясцовае выданне "Флагшток", якое вывучыла абвешчаныя тэндары.
Пра закупкі аптэчак абвясцілі Рагачоўскі, Светлагорскі і Кармянскі райвыканкамы. Аналагічныя заяўкі раней давалі выканкамы іншых абласцей Беларусі.
У розных раёнах купляюць розную колькасць аптэчак. Напрыклад, у Карме хочуць купіць чатыры аптэчкі, у Светлагорску — дзесяць, а ў Рагачове — толькі адну, але даволі дарагую: за 300 рублёў (каля 100 долараў).
У тэндары распісана, што павінна быць у аптэчцы. Некаторыя элементы ў пераліку, як адзначае "Флагшток", сведчаць, што гаворка ідзе пра аптэчку, якую прымяняюць пры баявых дзеяннях. Напрыклад, гэта нажніцы атраўматычныя з карабінам для хуткага мацавання на экіпіроўцы, індывідуальная картка агляду пацярпелага, сама аптэчка павінна быць у форме падсумка.
Імаверна, аптэчкі закупляюцца для мясцовай тэрытарыяльнай абароны.
