Самалёты "Аэрафлота" ў Мінску прызямляліся з грубымі парушэннямі
Самалёт "Аэрафлота" ў Мінску / airport.by
Самалёты расійскай кампаніі "Аэрафлот" апошнія месяцы зрабілі ў Нацыянальным аэрапорце Мінск некалькі пасадак з грубымі парушэннямі правілаў бяспекі. Гэтыя парушэнні маглі прывесці да катастрофы. Пра гэта выданню "Зеркало" расказаў былы пілот 1-га класа "Аэрафлота", вядомы авіяцыйны эксперт Андрэй Літвінаў са спасылкай на крыніцы ў кампаніі.
Гаворка ідзе пра так званыя нестабілізаваныя заходы. Падчас іх пілот працягвае прызямленне, хаця параметры самалёта не адпавядаюць норме. Праблема мае сістэмны характар, а апошнія вядомыя інцыдэнты такога кшталту адбыліся ў Мінску.
Паводле Літвінава, такія выпадкі з "Аэрафлотам" адбываюцца паўсюдна. "Не скажу, што колькасць расце ў геаметрычнай прагрэсіі, але некалькі выпадкаў было", — кажа эксперт.
Заход на пасадку называюць нестабілізаваным, калі да пэўнай вышыні палёту (як правіла, 1000 футаў або каля 300 метраў) самалёт не выведзены на патрэбную траекторыю і не адпавядае вызначаным параметрам. У стабільных межах павінны знаходзіцца хуткасць, вышыня, курс, вертыкальная хуткасць зніжэння, а таксама канфігурацыя самалёта (выпушчаныя шасі і закрылкі). Пры невыкананні гэтых умоваў пілот у адпаведнасці з правіламі павінен перапыніць заход і пайсці на другі круг.
Літвінаў называе фактары ў Мінску, якія могуць спрыяць такім інцыдэнтам. Па-першае, малы час палёту з Масквы пакідае экіпажу менш часу на поўную падрыхтоўку да пасадкі. Па-другое, у аэрапорце беларускай сталіцы нярэдка практыкуецца візуальны заход — не па дакладных прыборных сістэмах. Гэта ўскладняе пілотам кантроль за параметрамі, у прыватнасці, за вышынёй.
Эксперт кажа, што ў Мінску былі выпадкі, калі самалёт сядаў пры адступленнях ад нормы. Ён дадае, што беларускія авіяцыйныя ўлады могуць не ведаць пра гэтыя выпадкі, бо фармальна здарэння не было, а доступ да расшыфровак палётных звестак ёсць толькі ў авіякампаніі.
Прычынай частых інцыдэнтаў Літвінавў назваў сістэмныя праблемы ў "Аэрафлоце": нізкую якасць падрыхтоўкі пілотаў і некампетэнтнае кіраўніцтва.
Андрэй Літвінаў — лётчык 1-га класа, былы пілот "Аэрафлота" і авіяцыйны эксперт.
