Эстонская разведка: Пуцін хутка можа сесці за стол перамоў
Пуцін / kremlin.ru
Пуцін хутка можа сесці за стол перамоў, лічыць кіраўнік эстонскай разведкі Каўпа Розін. Да такога рашэння расійскага прэзідэнта можа падштурхнуць камбінацыя эканамічнага, ваеннага і сацыяльнага ціску.
Як сказаў Розін у інтэрв'ю CNN, ужо цягам чатырох-пяці месяцаў Пуцін "можа апынуцца не ў стане весці перамовы з пазіцыі сілы".
"Час не на баку Расіі. Я больш не чую размоў пра татальную перамогу. Людзі ў Крамлі разумеюць, што сітуацыя на ўкраінскім полі бою складваецца не занадта добра".
Штомесячна Расія цяпер губляе больш людзей, чым можа вербаваць. Пры гэтым, на думку кіраўніка разведкі Эстоніі, праз выкарыстанне дронаў з абодвух бакоў істотных зменаў лініі фронту не будзе — ані Расія, ані Украіна не здольныя ажыццявіць прарыў у тыл праціўніка.
Па падліках "Медузы" і "Медыязоны", ад лютага 2022 да канца 2025-га на вайне ва Украіне загінула каля 350 тысяч расійскіх вайскоўцаў.
