Наступ расійскіх войскаў з тэрыторыі Беларусі рэальны — галоўнакамандуючы УСУ

Наступальная аперацыя расійскіх войскаў на Украіну з тэрыторыі Беларусі рэальная. Пра гэта галоўнакамандуючы Узброеных Сіл Украіны Аляксандр Сырскі заявіў у інтэрв'ю ютуб-каналу "Мілітарний", якое выйшла 19 траўня.

"Мы ведаем даныя, што расійскі Генштаб цяпер актыўна пралічвае і плануе аперацыі наступальных дзеянняў з поўначы", — сказаў Сырскі.

15 траўня прэзідэнт Украіны Уладзімір Зяленскі пасля нарады з кіраўніцтвам сіл абароны заявіў, што расіяне спрабуюць пераканаць Лукашэнку далучыцца да новых агрэсіўных аперацый. Паводле Зяленскага, у РФ распрацоўваюць планы аперацый "па напрамках на поўдзень і на поўнач ад тэрыторыі Беларусі — альбо супраць Чарнігаўска-Кіеўскага кірунку ва Украіне, альбо супраць адной з краін NATO".

18 траўня Мінабаронцы Беларусі паведаміла пра пачатак трэніроўкі па ўжыванні ядзернай зброі — сумесна з расійскім бокам. Пра трохдзённыя вучэнні паведаміла 19 траўня і расійскае Мінабароны. На гэтых вучэннях, як заяўлялася, будуць адпрацоўвацца ў тым ліку "пытанні сумеснай падрыхтоўкі і прымянення ядзернай зброі, размешчанай на тэрыторыі Рэспублікі Беларусь".