Федэрацыя бокса і Саюз пяцібор'я знялі ўсе санкцыі з беларускіх спартоўцаў

Дзве міжнародныя федэрацыі адмянілі ўсе абмежаванні для беларускіх спартоўцаў. Гэта Сусветная баксёрская федэрацыя (World Boxing) і Міжнародны саюз сучаснага пяцібор'я (UIPM).

Адбылося гэта пасля таго, як Міжнародны алімпійскі камітэт рэкамендаваў зняць санкцыі з беларускіх спартоўцаў, дазволіўшы ім выступаць не ў статусе нейтральных атлетаў, а з дзяржаўнай сімволікай. Таксама МАК рэкамендаваў дазволіць спартоўцам з Беларусі выступаць не толькі ў індывідуальных, але і камандных відах спорту.

"З задавальненнем паведамляю вам, што ў адпаведнасці з рашэннем МАК Выканаўчы савет Сусветнай баксёрскай федэрацыі аднагалосна прыняў рашэнне адмяніць патрабаванні па ўдзелу беларускіх спартсменаў у якасці нейтральных спартсменаў (AIN)", — гаворыцца ў паведамленні генсакратара World Boxing Тома Дылена.  

Рашэнне пра адмену санкцый застаецца за федэрацыямі, і не ўсе з іх паспяшаліся выканаць рэкамендацыі МАК. Раней паведамлялася, што захоўваюцца абмежаванні супраць беларускіх тэнісістаў і лёгкаатлетаў.