Гомельскую дзяўчынку, якую пакусала зграя бяздомных сабак, пераводзяць з рэанімацыі

11-гадовую Ліду, якую пакусалі бяздомныя сабакі, сёння пераводзяць з рэанімацыі ў аддзяленне. Пра гэта журналістам "Моцных навінаў" расказала яе маці.

Здарэнне адбылося 8 траўня. Бяздомныя сабакі напалі на 11-гадовую жыхарку Гомеля. Выратаваў яе ад жывёл мужчына, які праязджаў міма на матацыкле. Аднак сабакі паспелі моцна пакусаць гамяльчанку. Школьніцу адразу шпіталізавалі ў рэанімацыю. Аперацыя па яе ратаванні працягвалася паўтары гадзіны.

Маці кажа, што ў дзяўчынкі шмат глыбокіх пракусаў па ўсім целе, на галаве і за вушамі. На шчаку таксама наклалі шво. Жыццёва важныя органы і артэрыі цудам не пацярпелі.

Першым часам дзяўчынка нічога не памятала пра інцыдэнт, але праз некалькі дзён згадала. Яна кажа, што ў той дзень развіталася з сяброўкамі і пайшла адна. Нечакана школьніца пабачыла чатырох сабак, якія беглі насустрач. Тыя ўчапіліся ёй у ногі, а калі яна павалілася — сталі грызці ўсё цела. Ліда кажа, што два сабакі кусалі а два стаялі побач.

Пасля гэтага здарэння ў Гомелі ўзмацнілі меры для адлову бадзяжных жывёл.