Грамадзяніна Беларусі асудзілі за "шпіянаж" у анексаваным Крыме

За "шпіянаж" на карысць Украіны ў анексаваным Крыме ў 2024 годзе асудзілі грамадзяніна Беларусі Аляксея Тамашова. Як перадае Радыё Свабода, нашаму суайчынніку прысудзілі 14 гадоў калоніі строгага рэжыму.

Пакаранне ён адбывае ў калоніі №4 у горадзе Пугачоў Саратаўскай вобласці. У Крымскататарскім рэсурсным цэнтры журналістам расказалі, што Аляксея доўгі час трымалі ў ШІЗА (штрафным ізалятары).

Тамашова затрымалі 8 траўня 2024 года, імаверна, у Севастопалі. Яго падазравалі ў перадачы ўкраінскім спецслужбам інфармацыі пра месцы дыслакацыі і перамяшчэння падраздзяленняў, узбраення і спецтэхнікі расійскіх войскаў. Таксама нашага суайчынніка падазравалі ў "нелаяльным стаўленні да палітыкі Расіі".

Прысуд яму вынес Севастопальскі суд.

Паведамляецца, што пасля затрымання Тамашову прызначылі амбулаторнае прымусовае назіранне і лячэнне ў псіхіятра, а ў прысудзе не было канкрэтных абвінавачанняў.

"Пастанавілі, што Аляксей мог перадаць, мог нашкодзіць і яшчэ шмат "мог бы", за што, уласна, і пазбавілі чалавека волі", — каментуюць у Крымскататарскім рэсурсным цэнтры.