Кароткачасовыя дажджы з мокрым снегам і парывісты вецер чакаюцца ў чацвер у Беларусі

У чацвер, 23 красавіка, у Беларусі ўначы будзе воблачна з праясненнямі, а ўдзень прагназуецца пераменная воблачнасць, паведамляе Белгідрамет.

У многіх раёнах пройдуць невялікія кароткачасовыя дажджы, месцамі — з мокрым снегам. Вецер чакаецца паўночна-заходні, паўночны парывісты, уначы месцамі, а зранку і ўдзень на большай частцы тэрыторыі моцны парывісты — да 15-20 метраў за секунду. Сіноптыкі абвясцілі аранжавы ўзровень небяспекі.

Тэрмометры ўначы пакажуць 1-7 градусаў вышэй за нуль. Удзень прагназуецца ад +6 градусаў па паўночным усходзе да +15 градусаў па паўднёвым захадзе краіны.

24 красавіка будзе воблачна з праясненнямі. Уначы пераважна без ападкаў, а ўдзень месцамі па краіне пройдуць невялікія кароткачасовыя ападкі — дождж, магчымы мокры снег. Вецер чакаецца паўночны, паўночна-заходні парывісты, днём месцамі — моцны парывісты. Уначы тэмпература паветра складзе -3...+3 градусы. Удзень чакаецца 7-14 градусаў цяпла.