Холадна і дажджліва. Надвор'е ў Беларусі на выхадныя
Надвор'е ў Беларусі / Еўрарадыё
Да канца траўня тэмпературны фон у нашай краіне будзе заставацца на 1–6 градусаў ніжэй за кліматычную норму, аднак у пачатку чэрвеня ў краіну пачнуць паступаць больш цёплыя паветраныя масы з паўднёвага захаду Еўропы.
30 траўня на большай частцы тэрыторыі Беларусі таксама чакаюцца кароткачасовыя дажджы, удзень месцамі прагрымяць навальніцы. Уначы будзе +3...+10°C, удзень — +11...+16°C, па захадзе краіны да +23°C.
У нядзелю, 31 траўня, месцамі пройдуць кароткачасовыя дажджы. Уначы і раніцай у асобных раёнах магчымы слабы туман. Тэмпература паветра ўначы складзе +2...+9°C, па захадзе — да +10...+12°C. Удзень паветра прагрэецца да +12...+18°C, а па захадзе — до +19...+23°C.
З пачаткам чэрвеня надвор'е стане заўважна цяплейшым. Паводле даных сіноптыкаў, у першай палове наступнага тыдня чакаецца паступленне цёплых няўстойлівых паветраных мас атлантычнага паходжання. Пры гэтым захаваюцца кароткачасовыя дажджы і навальніцы.
