"МЛ Віцебск" вітаў дзяцей з ДНР у Віцебску, але хутка выдаліў пост з Telegram
Віцебскі футбольны клуб раздаў падарункі "дзецям з ДНР" / "МЛ Віцебск"
Футбольны клуб "МЛ Віцебск", які з'яўляецца дзейным чэмпіёнам Беларусі, "прывітаў дзяцей з Данецкай Народнай Рэспублікі ў нашым прыгожым горадзе". Пра тое, што дзецям з акупаваных тэрыторый Украіны раздалі падарункі ад імя спартоўцаў, паведаміла ў сваім тэлеграм-канале прэс-служба віцебскага клуба. Аднак паведамленне хутка знікла.
"Мы спадзяемся, што гэтыя сувеніры, звязаныя з футболам, які аб’ядноўвае сэрцы мільёнаў людзей, прынясуць ім радасць, стануць добрым успамінам пра цёплы прыём у Віцебску і маленькімі сімваламі нашай дружбы", — заявілі ў прэс-службе.
Прымусовы вываз дзяцей з акупаваных тэрыторый Украіны ў Расію і Беларусь расцэньваецца як ваеннае злачынства. Менавіта праз гэта Міжнародны крымінальны суд выдаў ордар на Уладзіміра Пуціна і ўпаўнаважаную па правах дзіцяці ў РФ Марыю Львову-Бялову.
Для беларускага футбольнага клуба, якому неўзабаве трэба стартаваць у Лізе чэмпіёнаў, дэманстрацыйны ўдзел у такіх акцыях можа стаць праблемай.
Але фатаграфіі рэдакцыя Еўрарадыё паспела захаваць. На іх адлюстраваныя пакеты, верагодна, з памятнымі падарункамі. Дзеці сядзяць у вялікай зале.
Што такое ДНР
Так званая ДНР разглядаецца Украінай і большасцю дзяржаў свету як акупаваная Расіяй частка тэрыторыі Украіны. Беларусь афіцыйна не прызнала ні незалежнасць ДНР, ні яе ўваходжанне ў склад Расіі. Але пры гэтым падтрымлівае кантакты і супрацоўніцтва з яе адміністрацыяй.
У 2024 годзе кіраўнік Народнага антыкрызіснага ўпраўлення Павел Латушка сцвярджаў, што ў Беларусь было дэпартавана больш за 3,5 тысячы ўкраінскіх дзяцей.
Пра тое, што ўкраінскіх дзяцей вывозяць у Беларусь, прызнаваўся і Аляксандр Лукашэнка, калі прымаў у сябе кіраўніка так званай "Данецкай народнай рэспублікі" Дзяніса Пушыліна. Пры гэтым ён заявіў, што дзяцей прымаюць "сюды на лячэнне, адпачынак", а пасля паскардзіўся, што яму за гэта пагражаюць судом.
Дзяцей з так званых "ДНР" і "ЛНР" вазілі ў вайсковую часць 3214 унутраных войскаў МУС Беларусі. Дзеці пазіравалі перад фотакамерамі са зброяй.
