Мінскія дынамаўцы разбілі Кубак Шпенглера, заваяваны ў Швейцарыі

Хакеісты мінскага "Дынама" вярнуліся ў Беларусь без заваяванага ў Швейцарыі Кубка Шпенглера. Пасля фінальнага матчу ганаровы трафей быў... разбіты ў разьдзявальні нашай каманды, паведамляе агенцтва "Интерфакс-Запад". "Ён аказаўся настолькі крохкім, што выпадкова разбіўся", — кажа галоўны трэнер "Дынама" Аляксандр Андрыеўскі. Паводле яго слоў, да канца студзеня дынамаўцам паабяцалі прывезці дублікат кубка.

Дарэчы, ужо сёння мінскае "Дынама" паляцела ў Навасібірск, дзе 3 студзеня правядзе чарговы матч чэмпіянату Кантынентальнай хакейнай лігі супраць мясцовай "Сібіры".