Новым расійскім дыпламатам у Беларусі стаў намеснік баевіка "ЛНР" Платніцкага
Уладзіслаў Дэйнега / Луганскі інфармацыйны цэнтр
Уплыў "рускага свету" ў Беларусі ўзмацняецца праз прызначэнне адыёзных дыпламатаў. На гэта звярнула ўвагу выданне "Новы Час", праналізаваўшы сітуацыю.
Як паведамлялася раней, філію амбасады РФ у Гомелі ўзначаліў Аляксей Галаўнёў, які раней быў трэцім сакратаром амбасады Расіі ў Малдове і актыўна ўдзельнічаў у мерапрыемствах "Россотрудничества". Дыпламат носіць гадзіннік з літарай Z на цыферблаце.
Кіраўнік будучага аддзялення амбасады РФ у Віцебску Ігар Дзямяненка да лютага 2022 году быў генконсулам у Харкаве. Ён, як і многія іншыя расійскія дыпламаты, пакінуў Украіну за дзень да поўнамаштабнага ўварвання.
У Магілёве прадстаўніком Расіі прызначылі Уладзіслава Дэйнегу — аднаго з экс-кіраўнікоў так званай "ЛНР" і былога намесніка баевіка Ігара Платніцкага, які кіраваў "ЛНР". У 2017 годзе Дэйнега быў прызначаны "міністрам замежных справаў ЛНР".
У траўні 2020-га ўкраінскія журналісты даведаліся, што ён атрымаў расійскі пашпарт. А з 2024-га Дэйнега стаў прадстаўніком МЗС Расіі на акупаваных тэрыторыях Луганскай вобласці.
У Беларусь ён прыбыў у траўні 2026-га, як вынікае з паведамленняў у яго тэлеграм-канале.
