Сталі вядомыя хэдлайнеры фэсту LIDBEER — беларусы незадаволеныя

22/07/2026 - 15:24

Фэст LIDBEER / t.me/LIDBEERFEST

Арганізатары фэсту LIDBEER назвалі хэдлайнераў. Большасць з іх складаюць расійскія гурты і выканаўцы.

Сярод іх — былы лідар рок-гурта "Смысловые галлюцинации" Сяргей Бабунец, спявачка MakSим (папулярная ў 2000-х), гурт "Комната культуры" (заснаваны ў 2022 годзе, вядомая яго песня "Поезда"), orchestra dance-rock ГУДТАЙМС (створаны ў 2008 годзе).

Ад Беларусі будуць выступаць кавер-гурт IODO BAND і фолк-рок-гурт KaS. Закрываць галоўную сцэну LIDBEER-2026 будзе беларускі дыджэй Alexander Spark.

Як заўважыла выданне hrodna.life, карыстальнікі сацсетак адрэагавалі на спіс хэдлайнераў пераважна негатыўна. Людзі пісалі, што гэта не падобна да беларускага фестывалю, што ведаюць толькі МакЅім і такое не слухаюць. Пры гэтым ёсць і шмат "агеньчыкаў" і станоўчых эмодзі.

Сёлета LIDBEER у Лідзе пройдзе 29 жніўня. У красавіку паведамлялася пра адмену фэсту "па прычынах, якія не залежаць ад арганізатараў". Аднак літаральна праз тыдзень стала вядома, што фэст дазволілі правесці.

Першая партыя квіткоў ужо раскупленая.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.