Моцныя дажджы і навальніцы чакаюцца ў аўторак па ўсходзе Беларусі

У аўторак, 9 чэрвеня, у Беларусі чакаецца пераменная воблачнасць, паведамляе Белгідрамет.

Пераважна па ўсходняй палове краіны пройдуць дажджы, у асобных раёнах чакаюцца навальніцы, уначы па паўднёвым усходзе месцамі — моцныя дажджы. Уначы і зранку ў асобных раёнах будзе згушчацца туман. Вецер прагназуецца паўночна-заходні ўмераны, пры навальніцах — парывісты.

Тэрмометры ўначы пакажуць ад +8 градусаў па паўночным захадзе да +16 градусаў па ўсходзе Беларусі. Удзень паветра прагрэецца да 21-27 градусаў вышэй за нуль.

У сераду, 10 чэрвеня, будзе воблачна з праясненнямі. Уначы месцамі, а зранку і ўдзень на большай частцы тэрыторыі краіны пройдуць кароткачасовыя дажджы. У асобных раёнах прагрымяць навальніцы. Уначы і зранку месцамі чакаецца слабы туман. Вецер будзе пераменных напрамкаў умераны, пры навальніцах — парывісты.

Уначы тэрмометры пакажуць 9-16 градусаў цяпла. Удзень будзе +22...+28 градусаў, месцамі прагназуецца 18-21 градус вышэй за нуль.