На беларуска-расійскай мяжы сталі правяраць алкаголь у багажы аўто

Расійскія памежнікі, якія дзейнічаюць на мяжы з Беларуссю, сталі правяраць у багажы аўто расліны і алкаголь. Такую праверку заўважылі на мінулых выходных, пішуць праваабаронцы MAYDAY.

Памежнікі сталі нагадваць тым, хто едзе ў Расію, што норма ўвозу алкаголю на тэрыторыю РФ складае тры літры любога мацунку на аднаго паўналетняга чалавека. Для ўвозу хатніх раслін праз мяжу патрабуецца адпаведны каранцінны сертыфікат. Такія патрабаванні з'явіліся на адным з КПП у Пскоўскай вобласці Расіі (аўтадарога Наваполацк-Себеж).

Кіроўцы, якія праязджалі мяжу, кажуць, што сапраўды бачылі на сметніцах каля КПП хатнія расліны ў гаршках — гэта можа сведчыць пра канфіскацыю забароненых да правозу прадметаў.

Фактычны памежны кантроль на мяжы з Беларуссю Расія аднавіла з канца красавіка. Ва ўсіх падарожнікаў фатаграфуюць пашпарты ці ўносяць іх даныя ў спецыяльную базу. Расійскія памежныя патрулі заўважылі нават на грунтавых дарогах, якія мясцовыя жыхары называюць "ляснымі".