На чацвер у Беларусі абвешчаны аранжавы ўзровень небяспекі

У чацвер, 21 траўня, у Беларусі чакаецца воблачнае з праясненнямі надвор'е, паведамляе Белгідрамет.

На большай частцы тэрыторыі пройдуць кароткачасовыя дажджы, прагрымяць навальніцы, пры навальніцах месцамі прагназуюцца моцныя залевы, удзень — град. Уначы і зранку ў асобных раёнах будзе назірацца слабы туман. Вецер чакаецца паўночнай чвэрці ўмераны, пры навальніцах — парывісты. Удзень месцамі прагназуецца шквалістае ўзмацненне ветру да 15-20 метраў за секунду. Сіноптыкі абвясцілі аранжавы ўзровень небяспекі.

Уначы тэрмометры пакажуць 10-16 градусаў цяпла. Удзень паветра прагрэецца ад +18 па паўночным захадзе да +31 градуса па ўсходзе.

У пятніцу, 22 траўня, будзе воблачна з праясненнямі. На большай частцы тэрыторыі Беларусі пройдуць кароткачасовыя дажджы, удзень па паўднёвым усходзе месцамі чакаюцца моцныя дажджы. У асобных раёнах прагрымяць навальніцы. Вецер будзе паўночны, паўночна-заходні парывісты, удзень на паўднёвым усходзе пры навальніцах — моцны парывісты.

Тэмпература паветра ўначы складзе ад +9 па захадзе да +18 градусаў па паўднёвым усходзе. Удзень прагназуецца 18-24 градусы цяпла, па паўднёвым усходзе будзе 25-29 градусаў вышэй за нуль.