На дзяржСМІ летась выдаткавалі ў пяць разоў больш, чым было запланавана ў бюджэце

Летась некаторыя дзяржаўныя структуры выдаткавалі бюджэтных грошай у некалькі разоў больш, чым планавалася. Увагу на гэта звярнула выданне "Зеркало", якое прааналізавала справаздачу аб выкананні рэспубліканскага бюджэту за 2025 год.

Найбольш выраслі выдаткі на Міністэрства інфармацыі — амаль у пяць разоў. Спярша ў бюджэце планавалася вылучыць 21,84 млн рублёў. Аднак па выніках года міністэрства атрымала амаль 104,8 млн рублёў. Прычым амаль увесь прырост сышоў на фінансаванне дзяржаўных СМІ — з 21,7 млн да 104,7 млн рублёў.

Выраслі таксама выдаткі на апарат Упаўнаважанага па справах рэлігій і нацыянальнасцяў. Замест запланаваных у бюджэце 928 тысяч рублёў было вылучана 2,473 млн рублёў — у 2,6 разу больш.

Больш як на 740 млн выраслі выдаткі на Міністэрства прамысловасці. Замест запланаваных у бюджэце 3,003 млрд ведамства атрымала 3,745 млрд рублёў — на 25% больш. Частка гэтых грошай пайшла на падтрымку дзяржпрадпрыемстваў, яшчэ частка — на "іншыя агульнадзяржаўныя пытанні".

Кіраўнік спраў Лукашэнка выдаткаваў з бюджэту на 18% больш запланаванага: замест 500,3 млн — 590,4 млн. Дабаўленыя грошы пайшлі пераважна на працу самой структуры і таксама нейкія "іншыя агульнадзяржаўныя пытанні". Не ўклаўся ў запланаваны бюджэт і Аператыўна-аналітычны цэнтр пры Лукашэнку: яму дадалі на 17,4% больш, чым збіраліся — 41,5 млн супраць 35,5 млн рублёў.

Камітэт дзяржбяспекі атрымаў 452,1 млн рублёў замест запланаваных 420,3 млн рублёў. Чаму выдаткі павялічыліся на 7,6%, у справаздачы аб бюджэце не гаворыцца.