На Viva Braslav выступяць расійскія артысты, якія падтрымліваюць вайну супраць Украіны
Браслаў / Euroradio
На фэсце Viva Braslav выступяць расійскія артысты, у тым ліку тыя, якія падтрымліваюць вайну супраць Украіны і трапілі пад украінскія санкцыі.
Як паведамляюць арганізатары, на фестывалі чакаецца беларускі выканаўца LYRIQ, а таксама расійскія артысты Дзіма Білан, МОТ, Ваня Дзмітрыенка, гурты "Комната культуры", "Давай на ты".
Дзіма Білан ў 2017 годзе трапіў у базу звестак украінскага Цэнтра "Міратворац" — за паездку ў акупаваны Крым. У студзені 2023-га Украіна ўнесла яго ў "чорны спіс" за антыўкраінскую дзейнасць і падтрымку расійскай агрэсіі. У лютым таго ж года Канада ўключыла Білана ў спіс "расійскіх агентаў дэзінфармацыі" за распаўсюд прапаганды.
Артыст МОТ (сапраўднае імя Мацвей Мельнікаў) трапіў у базу "Міратворца" ў траўні 2017-га: ён удзельнічаў у прапагандысцкіх мерапрыемствах у акупаваным Крыме. У кастрычніку 2022-га МОТ трапіў пад украінскія санкцыі за падтрымку расійскай агрэсіі.
Фэст Viva Braslav праводзіцца на Браслаўскіх азёрах з 2013 года. Сёлета ён адбудзецца 24-26 ліпеня.
