"Не запатрабавана" — з вядомай мінскай кавярні прыбралі беларускае меню
Кавярня Mon Nom у Мінску / relax.by
У вядомай мінскай кавярні Mon Nom на Трактарным заводзе больш няма меню па-беларуску. Раней яно было адной з фішак установы ў "доме з русалкамі".
Нядаўна адна з наведніц кавярні па старой звычцы папрасіла афіцыянта прынесці беларускае меню, ёй адказалі, што "яго даўно прыбралі". Супрацоўнікі заявілі, што яно было незапатрабаванае, піша "Наша Ніва".
"Раней на беларускамоўнае меню быў запыт, таму мы друкавалі і на рускай мове, і на англійскай, і на беларускай. За апошні час ніхто беларускамоўнае меню ў нас не прасіў, таму мы яго больш не падаём", — сказалі ў кавярні.
Адзначаецца, што раней афіцыянты прыносілі меню па-беларуску, толькі пачуўшы, як наведвальнікі размаўляюць — пра гэта нават не трэба было прасіць.
Дарэчы, у 2023-м бістро Mon Nom адкрылася таксама ў Варшаве (а ў 2025‑м яшчэ адно). У варшаўскай кавярні меню прапаноўваюць на беларускай, польскай, украінскай і англійскай мовах.
