Пад пагрозай дэпартацыі з ЗША аказаліся каля трох тысячаў беларусаў

Пад пагрозай дэпартацыі з ЗША аказалася вялікая колькасць беларусаў. З трох мільёнаў заведзеных спраў аб прытулку 3162 датычаць беларусаў, якія цяпер знаходзяцца ў зоне асаблівай рызыкі. Такія лічбы тэлеканалу "Белсат" назваў кіраўнік ініцыятывы ByAction Яўген Ждановіч.

Гаворка ідзе найперш пра тых, хто трапіў на тэрыторыю ЗША праз Мексіку і не меў адпаведнай візы. Ждановіч кажа, што такі ўчынак не з’яўляецца крымінальным ці грубым парушэннем амерыканскіх законаў. Любы чалавек мае права на мяжы ці на тэрыторыі Штатаў папрасіць прытулку праз палітычны, рэлігійны ці іншы пераслед. Вялікая частка беларусаў, якім цяпер пагражае арышт і дэпартацыя, прыехалі ў ЗША менавіта праз мексіканскую мяжу.

У ініцыятыве ByAction кажуць, што ад пачатку 2025 года было затрымана як мінімум 127 грамадзянаў Беларусі — 107 мужчын і 20 жанчын. На момант складання апошняй справаздачы пра сітуацыю з беларускімі мігрантамі пад вартай заставаліся 64 чалавекі, 8 былі дэпартаваныя і 9 пагадзіліся на добраахвотны выезд з тэрыторыі ЗША.

Паведамляецца, што людзей арыштоўваюць і змяшчаюць у цэнтры ізаляцыі яшчэ да разбору ў справе прытулку для іх.

Ждановіч звяртае ўвагу, што ад ліпеня 2025-га колькасць станоўчых рашэнняў аб прытулку для беларусаў рэзка знізілася. У траўні 2026-га быў зафіксаваны антырэкорд — 76% разгледжаных спраў атрымалі адмоўныя рашэнні. Для параўнання: у траўні 2025-га станоўчыя рашэнні наконт прытулку атрымалі 73% спраў.

Праблемай становяцца і пратэрмінаваныя пашпарты ў беларускіх мігрантаў. Абмяняць іх у беларускіх консульствах немагчыма, таму беларусы не могуць самастойна пакінуць тэрыторыю ЗША.

У сувязі з новай хваляй цяжкасцяў для беларусаў у ЗША Ждановіч вельмі разлічвае на дапамогу з боку Офіса Святланы Ціханоўскай. 

Дыпламатычны дарадца Ціханоўскай Дзяніс Кучынскі кажа, што ведае пра сітуацыю беларускіх мігрантаў у Злучаных Штатах. Паводле яго, юрыдычная каманда офісу працуе з тэматычнымі зваротамі: збірае інфармацыю, аналізуе кожны выпадак і правярае, ці ёсць рэальная рызыка пераследу ў выпадку вяртання ў Беларусь. Пасля ўнутранай праверкі юрыдычная каманда перадае адпаведныя кейсы ў Дзярждэпартамент ЗША. Офіс Ціханоўскай, дадае Кучынскі, падтрымлівае з амерыканскім бокам пастаянны кантакт, але непасрэдныя рашэнні прымаюць самі амерыканцы.