Падчас атакі на Кіеў расійскія дроны ляцелі і праз Беларусь

Расійскія дроны падчас нядаўняй разбуральнай атакі на Кіеў выкарыстоўвалі беларускую паветраную прастору. Гэта зафіксавалі ўкраінскія маніторынгавыя каналы, піша "Флагшток".

Масіраваны ўдар па Кіеве адбыўся ўначы 23 траўня. Першыя паведамленні маніторынгавых каналаў пра дроны, якія рухаюцца з тэрыторыі Беларусі з'явіліся каля 5:20. Украінскі маніторынгавы канал "Рында маніторыць" гэтым часам паведаміў, што "на працягу ночы адзначаныя неаднаразовыя залёты БПЛА з тэрыторыі Беларусі, цяпер адзін з іх рухаецца ў бок Чарнобыльскай зоны адчужэння".

Той жа канал паведаміў пра новыя залёт беспілотнікаў у 6:11, 6:45 і 6:54. У 7:06 там з'явілася паведамленне, што чарговы дрон рухаецца з тэрыторыі Беларусі ў бок Прыпяці. Аналагічнае паведамленне з'явілася ў 10:10.

Сітуацыя паўтарылася і наступнай ноччу, перад запускам расійскіх ракет. У 2:31 дрон заляцеў ва Украіну з тэрыторыі Гомельшчыны курсам на Чарнобыль, у 2:33 — курсам на Оўруч, а ў 2:40 — зноў курсам на Чарнобыль.

Пра залёты дронаў з тэрыторыі Беларусі пісалі і іншыя ўкраінскія маніторынгавыя каналы. Агулам 23-24 траўня былі зафіксаваныя мінімум дзевяць залётаў. Мяркуючы па апублікаваных схемах, дроны былі запушчаныя з Бранскай вобласці і рухаліся ўздоўж беларуска-ўкраінскай мяжы.