Падчас атакі на Украіну расійскі дрон заляцеў у Румынію і пацэліў у шматпавярховік

У румынскім горадзе Галац баявы дрон упаў на дах жылога шматпавярховага дома і выбухнуў. Гэта здарылася ў ноч на 29 траўня.

У выніку пажару, які пачаўся на верхніх паверхах дома, пацярпелі два чалавекі — маці і дзіця, якія жылі на апошнім паверсе. Абаіх з апёкамі даставілі ў бальніцу. У Міністэрстве абароны Румыніі зранку 29 траўня заявілі, што паводле папярэдняй інфармацыі гэта быў расійскі дрон "Герань-2" (вядомы таксама як "Шахед"), перадае newsmaker.md.

У ноч на 29 траўня расійскія войскі атакавалі грамадзянскія і інфраструктурныя аб'екты ва Украіне каля румынскай мяжы. Падчас атакі адзін з расійскіх беспілотнікаў заляцеў у Румынію. Пры падзенні на дах дома ён выбухнуў. З дома эвакуявалі каля 70 чалавек. Акрамя маці і дзіця, якіх даставілі ў бальніцу, дапамога спатрэбілася яшчэ двум жыхарам — ім дапамаглі справіцца з панічнымі атакамі.

У Мінабароны Румыніі назвалі гэты інцыдэнт выклікам рэгіянальнай бяспецы і стабільнасці ў Чарнаморскім рэгіёне. "Такія інцыдэнты дэманструюць непавагу Расійскай Федэрацыі да нормаў міжнароднага права і пагражаюць не толькі бяспецы румынскіх грамадзян, але і калектыўнай бяспецы NATO", — падкрэслілі ў румынскім ведамстве.

Дарэчы, пасля выяўлення беспілотнікаў каля мяжы Румынія падняла ў паветра два знішчальнікі F-16, а жыхарам некалькіх паветаў разаслалі папярэджанні.