Паедзем на шашлыкі? Колькі трэба грошай і як змяніліся цэны за год

30/04/2026 - 17:05

На прыродзе / Euroradio / ChatGPT

Майскія святы — добрая нагода адкрыць сезон шашлыкоў. Вывучыўшы даныя Белстата, Еўрарадыё падлічыла, у якую суму абыдзецца ў сярэднім кошык для вясновага пікніка ў 2026 годзе, і параўнала цэны на прадукты, якімі мы закупляліся год таму.

Параўноўваем цэны на прадукты. Яны чакана падраслі, але не на ўсё

Уявім, што ў нас невялікая кампанія — і спачатку ідзём па мяса.

Бескасцёвая свініна — класічны выбар для шашлыку. Такое мяса даволі мяккае, і яго лёгка наразаць. У мінулым годзе за кілаграм свініны беларусы аддавалі ў сярэднім 15,50 рубля, у 2026-м цэны прадказальна выраслі — цяпер гэта ўжо 17,22 рубля.

Курынае мяса застаецца больш бюджэтным варыянтам, і яго цана за год амаль не змянілася: у 2025-м за кілаграм куранят (уключаючы бройлераў) плацілі 6,44 рубля, у гэтым годзе — 6,69.

Каб замарынаваць шашлык, скарыстаемся самым простым рэцэптам.

Нам спатрэбіцца рэпчатая цыбуля, якая, дарэчы, крыху патаннела: у мінулым годзе — 1,87 рубля за кілаграм, у гэтым — 1,68. Бутэлька воцату за год падаражэла з 2,65 да 2,88 рубля. Пакет солі цяпер каштуе 0,90 рубля (супраць 0,76 год таму), кілаграм цукру — 2,81 рубля (у 2025-м — 2,67).

Кошт пакеціка чорнага молатага перцу (50 грамаў) вырас з 7,03 да 7,66 рубля.

Каб шашлык быў яшчэ смачнейшы, не забываем пра соусы: кетчуп цяпер у сярэднім каштуе 10,31 рубля (9,59 год таму), маянэз — 11,05 рубля (супраць 9,46 у 2025-м).

Абавязкова кладзём у кошык гародніну.

Паводле апошніх даных Белстата, сярэдняя цана за кілаграм памідораў складае 11,46 рубля (11,39 — у 2025-м), агуркоў — 7,48 (6,46 — год таму), салодкага перцу — 15,93 рубля (14,62 — у 2025-м).

Таксама дадамо ў кошык хлеб — 3,31 рубля супраць 2,98 у мінулым годзе, а яшчэ цвёрды або паўцвёрды сыр: у 2026 годзе яго сярэдняя цана складае 24,43 рубля за кілаграм, у 2025-м была 23,87.

У выніку базавы кошык для пікніка ў 2026 годзе абыдзецца беларусам у 123,81 рубля. Год таму такі ж набор каштаваў 115,29 рубля. За год прадукты для шашлыка на невялікую кампанію падаражэлі на 8,52 рубля, або прыкладна на 7,4%.

Добрая навіна ў тым, што астаткаў солі, цукру і воцату хопіць яшчэ на некалькі выездаў на прыроду.

Поехали на шашлыки? Сколько нужно денег и как изменились цены за год

Параўнанне прадуктовых кошыкаў для пікніка за 2025 і 2026 гады / Euroradio / NotebookLM

Белстат — гэта як у сярэднім па палаце

Дарэчы, калі пахадзіць па крамах і рынках або замовіць нешта загадзя, прадуктовы кошык для пікніка можа абысціся танней. Тут справа не толькі ва ўсярэдненай статыстыцы Белстата, але і ў зніжках перад святамі.

Давайце паглядзім цэны на прадукты, якія прапануе сайт “Е-дастаўкі”.

Свініна шыйная частка (1 кг) — 27,55 руб.
Сцягно з часткай спінкі кураняці-бройлера (1 кг) — 8,57 руб.

Воцат — 2,15 руб.
Соль — 1,05 руб.
Цукар — 2,79 руб.
Молаты перац (30 г) — 3,49 руб.

Кетчуп “Махееў шашлычны” (500 г) — 4,79 руб.
Маянэз “Залатая кропля Правансаль Люкс 67%” (200 г) — 1,99 руб.

Цыбуля рэпчатая (1 кг) — 1,68 руб.
Памідоры ружовыя (1 кг) — 7,29 руб.
Перац чырвоны салодкі (1 кг) — 12,75 руб.
Агуркі (1 кг) — 7,55 руб.

Хлеб “Аматарскі нарэзаны” (900 г) — 1,69 руб.
Сыр паўцвёрды “Сулугуні” (1 кг) — 26,55 руб.

У выніку за прадукты для шашлыка, набытыя праз “Е-дастаўку”, мы заплацім 109,89 рубля.

Збяромся па-хуткаму

Калі няма жадання моцна замарочвацца, але пры гэтым хочацца зэканоміць, то зараз у “Еўраопце” праходзіць акцыя “Грыль Фэст”: мяса, салаты, гародніна і інвентар можна купіць са зніжкамі непасрэдна ў краме.

Калі заказваць праз “Е-дастаўку”, то шашлык “Усходні” са свініны абыдзецца беларусам у 17,77 рубля, а кілаграм гатовага вострага шашлыку з кураняці-бройлера — амаль у 12 рублёў.

Нават калі дадаць у кошык з гатовым шашлыком лаваш, пару гатовых салатаў або тыя ж самыя гародніну, хлеб, сыр і кетчуп, такі варыянт усё роўна выглядае самым выгадным.

Які шашлык без шампураў, мангала і… клопату пра прыроду?

Каб прыгатаваць шашлык, нам спатрэбіцца яшчэ і інвентар.

Просты мангал з “нержавейкі” шырынёй 25 см на сайце “Е-дастаўкі” прапануюць за 16,99 рубля (з улікам зніжкі 14%). Такі ж, але крыху большы, абыдзецца амаль у 40 рублёў (зніжка — 16%).

Набор з шасці шампураў сёння можна купіць крыху менш чым за 15 рублёў з улікам зніжкі 24%, а рашотку для грыля — прыкладна за 24 рублі (зніжка перад святамі — 23%).

2,5 кілаграма драўнянага вугалю бяром за 13 рублёў (цана да зніжкі — 14,55). Вадкасць для распальвання ў самім “Еўраопце” каштуе каля 4 рублёў за літр.

Набор аднаразовых шклянак купляем за 1,75 рубля, талерак — за 2,69 рубля.

Не забываем прыбраць пасля сябе — набор вялікіх смеццевых пакетаў можна купіць праз “Е-дастаўку” ўсяго за 3,35 рубля.

Увага: калі не хочаце сапсаваць сабе адпачынак, не забудзьце спрэй ад кляшчоў і іншых насякомых. Ён каштуе каля 6,69 рубля.

Каб шашлыкі лепш засвойваліся — піце больш вадкасці.

Прыемных вам выхадных!