Парушэнні шчытавіцы выявілі ў 35% абследаваных студэнтак і навучэнак
У кожнай трэцяй дзяўчыны выявілі праблемы са шчытавіцай, ілюстрацыйнае фота / pexels.com
У 35% дзяўчат, абследаваных падчас прафілактычнай акцыі, выявілі парушэнні функцыі шчытападобнай залозы. Такую статыстыку апублікавала 25 траўня прэс-служба Міністэрства аховы здароўя.
Паведамляецца, што ў абследаванні ўзялі ўдзел дзяўчаты з 42 навучальных устаноў — студэнткі ВНУ, навучэнкі ўстаноў прафесійна-тэхнічнай і сярэдняй спецыяльнай адукацыі. Агулам было 1447 чалавек. І ў 507 з іх выявілі паталогію і парушэнні функцыі шчытавіцы.
У Мінздароўя адзначаюць, што парушэнне функцыі гэтага органа можа стаць прычынай "эндакрыннай бясплоднасці".
Раней у Мінздароўя паведамлялі, што цукровы дыябет займае першае месца сярод эндакрыналагічных захворванняў. На другім ідуць захворванні шчытападобнай залозы: у Мінску зарэгістравана больш за 100 тысяч выпадкаў такіх захворванняў. За апошнія 20 гадоў распаўсюджанасць захворванняў шчытавіцы вырасла ў восем разоў, што лекары звязваюць найперш з паляпшэннем якасці дыягностыкі.
