"Першай пацерпіць Беларусь": Бабарыка пра ўцягванне краіны ў вайну РФ супраць Украіны

На Міжнародным кніжным кірмашы ў Варшаве ў Віктара Бабарыка спыталі пра верагоднасць уцягвання Беларусі ў вайну Расіі супраць Украіны. Палітык не стаў адмаўляць такога сцэнара:

"Любы маразм, любы зрэжысіраваны сцэнар мае права на існаванне. Я нават не магу ўявіць сітуацыю, у якой зараз можна ўпэўнена сказаць: “не, такога дакладна не будзе”. Калі рашэнні прымаюць неадэкватныя людзі, прадказаць штосьці складана.

З пункту гледжання логікі і здаровага сэнсу, мне здаецца, такога быць не павінна. Але я больш баюся правакацый з боку Расіі — каб не адбылося нейкага глупства і каб тыя, хто стаіць на баку дабра, зрабілі ўсё магчымае для прадухілення правакацыі. Бо яна сапраўды можа прывесці да пашырэння вайны на вялікую тэрыторыю.

І я думаю, што калі нейкі жудасны сцэнар усё ж такі здарыцца, то першай пацерпіць Беларусь. Я ў гэтым абсалютна ўпэўнены. Не краіны Балтыі і не Польшча — спачатку гэта будзе Беларусь. А далей ужо невядома, як усё можа разьвівацца. І гэта, насамрэч, вельмі страшна”.

Палітык прысутнічае ў Варшаве на прэзентацыі "Справы Віктара Бабарыка". Кніга Сабіны Брыло выйшла ў эмігранцкім выдавецтве "Сведкі".