У Арменіі пачалося галасаванне на парламенцкіх выбарах

У Арменіі пачалося галасаванне на парламенцкіх выбарах. Па ўсёй краіне адкрыліся выбарчыя ўчасткі. Усе палітычныя сілы, якія ўдзельнічаюць у кампаніі, называюць гэтыя выбары лёсавызначальнымі, паведамляе News.am.

Прагаласаваць можна будзе да 20:00 па ерэванскім часе. Галасаванне за межамі краіны не праводзіцца.

Чакаецца, што каля 23:00 ЦВК пачне публікаваць першыя вынікі з невялікіх аддаленых сельскіх участкаў. Аднак яны не будуць паказальнымі для агульнай карціны.

Паводле досведу мінулых гадоў, больш-менш зразумелы расклад сіл у новым парламенце пачне вымалёўвацца каля 02:00–03:00 ночы, калі паступяць вынікі з буйных гарадоў, у тым ліку са сталіцы краіны — Ерэвана, дзе жыве каля траціны выбарцаў.

Электронны падлік галасоў павінен завяршыцца да 08:00 раніцы 8 чэрвеня.

Парламент Арменіі абіраецца паводле прапарцыйнай сістэмы — толькі па партыйных спісах. За месцы ў Нацыянальным сходзе Арменіі дзявятага склікання змагаюцца 18 палітычных сіл: 16 партый і два партыйныя блокі.

Праходны бар’ер для партый складае 4%, для блокаў — 8%.