"МЛ Віцебск" папіярыўся на дзецях з акупаваных тэрыторый Украіны. Ці будуць наступствы?

Кіраўніцтва футбольнага клуба "МЛ Віцебск" вырашыла выкарыстаць падлеткаў з акупаваных тэрыторый Украіны ў сваіх PR-мэтах. 19 траўня ў тэлеграм-канале яны размясцілі паведамленне з фотаздымкамі са сустрэчы, дзе клуб "вітаў дзяцей з Данецкай Народнай Рэспублікі ў нашым прыгожым горадзе". Але літаральна адразу паведамленне было выдалена.

Еўрарадыё спытала ў юрыста НАУ Міхаіла Кірылюка, навошта гэта ўсё клубу, ці будзе гэтая акцыя мець наступствы і чаму паведамленне хутка выдалілі.

Падобна, што кіраўніцтва клуба само разумее магчымыя наступствы гэтай акцыі, сцвярджае эксперт.

— Тут важна адзначыць: вываз дзяцей з акупаваных тэрыторый Украіны разглядаецца як ваеннае злачынства. Безумоўна, кіраўніцтва клуба не прымала непасрэднага ўдзелу ў гэтым злачынстве і не вывозіла дзяцей асабіста. Але яно фактычна выкарыстала гэтую акцыю для піару і тым самым аказалася ўцягнутым у апраўданне дзеянняў адміністрацыі Лукашэнкі, — падкрэслівае Кірылюк.

— Пазіцыя беларускіх уладаў вядомая: яны прадстаўляюць гэта як гуманітарную дапамогу дзецям. Пры гэтым на аргументы пра тое, што па сутнасці гаворка ідзе пра вываз дзяцей з акупаваных тэрыторый, яны не адказваюць. А міжнароднае права ў гэтым пытанні займае дастаткова адназначную пазіцыю.

І менавіта тое, што кіраўніцтва клуба выдаліла гэты пост, сведчыць пра тое, што яны зразумелі магчымыя палітычныя і рэпутацыйныя наступствы, — упэўнены юрыст.

Рэжым Лукашэнкі пару гадоў таму смела хваліўся такімі акцыямі, але потым актыўнасць практычна сышла на нішто. У першую чаргу яны былі накіраваныя на ўнутраную аўдыторыю, "на грамадзян Беларусі, якія могуць не ведаць усіх юрыдычных і палітычных нюансаў гэтай сітуацыі", дадае Кірылюк. Верагодна, у клубе вырашылі ўспомніць былыя "подзвігі" рэжыму, але пасля задумаліся пра наступствы.

— Кіраўніцтва клуба ў гэтай гісторыі таксама прыняло ўдзел. І наступствы для іх сапраўды могуць быць, паколькі з палітычнага і этычнага пункту гледжання гэта выглядае вельмі спрэчна.

Тым больш цяпер, калі ствараецца спецыяльны трыбунал па ваенных злачынствах Пуціна і Лукашэнкі. Лукашэнка таксама фігуруе сярод абвінавачаных. Акрамя таго, расследаванне ў дачыненні да яго ў межах Міжнароднага крымінальнага суда нядаўна перайшло на іншую стадыю, і ордар на яго арышт тэарэтычна можа быць выдадзены ў любы момант.

У гэтым кантэксце сітуацыя выглядае асабліва адчувальнай. І кіраўніцтва спартыўных арганізацый, пры ўсіх агаворках, безумоўна, улічвае палітычныя абставіны. Таму яны могуць адрэагаваць на падобныя дзеянні, хоць і не абавязаныя гэтага рабіць, — упэўнены Міхаіл.

Якія могуць быць наступствы для клуба пасля такой спробы спадабацца рэжыму Лукашэнкі?

— Тут таксама важна разумець: не існуе нейкага дэталёва прапісанага закона, дзе было б указана, што, напрыклад, удзел у мерапрыемстве з дзецьмі, вывезенымі з акупаваных тэрыторый, караецца канкрэтным тэрмінам або штрафам.

Тут дзейнічаюць больш шырокія прынцыпы — прынцыпы нейтральнасці, этыкі і недапушчальнасці ўдзелу ў падтрымцы магчымых міжнародных злачынстваў. Гэтыя прынцыпы замацаваныя ў розных спартыўных дэкларацыях і рэгламентах, і спартыўныя арганізацыі маюць права іх прымяняць.

Таму, калі яны палічаць, што парушэнне было дастаткова сур’ёзным, могуць быць прынятыя і пэўныя меры.

І, безумоўна, будзе вельмі непрыемна, калі беларускія спартсмены атрымаюць нейкія абмежаванні толькі таму, што кіраўніцтва клуба вырашыла атрымаць палітычныя бонусы ў вачах Лукашэнкі праз удзел у гэтым вельмі спрэчным мерапрыемстве, — заключае Міхаіл Кірылюк.

Еўрарадыё накіравала запыт ва УЕФА з просьбай даць ацэнку гэтай акцыі "МЛ Віцебск". Як толькі будзе атрыманы адказ, ён адразу будзе апублікаваны.

Нагадаем, што ў гэтым сезоне "МЛ Віцебск" пачне свой еўракубкавы шлях з першага кваліфікацыйнага раўнда Ліга чэмпіёнаў УЕФА.