Удар па Кіеве: 10 загінулых, больш за 50 пацярпелых, 20 дамоў пашкоджана

У ноч на 2 ліпеня расійскія войскі нанеслі масіраваны ўдар па Кіеве з прымяненнем ударных беспілотнікаў і балістычных ракет. У выніку загінулі 10 чалавек, паведаміў мэр украінскай сталіцы Віталій Клічко.

Параненні атрымалі 56 чалавек, у тым ліку двое дзяцей, дадаў кіраўнік Кіеўскай гарадской ваеннай адміністрацыі Цімур Ткачэнка. Па яго словах, пашкоджанні і разбурэнні зафіксаваны больш чым у 30 месцах ва ўсіх раёнах горада. 

У Дарніцкім раёне часткова абрынуліся пяці-, дзевяці- і 16-павярховыя дамы, у Пячэрскім і Дзясняньскім раёнах пацярпелі дзве дзевяціпавярховыя будыніны. 

У Святошынскім раёне пашкоджанні атрымалі два прыватныя дамы, а ў Шаўчэнкаўскім і Галасееўскім загарэліся семі-, пяці- і 16-павярховыя жылыя дамы. Таксама ў Шаўчэнкаўскім раёне ўспыхнула будынак гасцініцы, у Абалонскім — тэрыторыя склада.

Паводле даных Дзяржаўнай службы па надзвычайных сітуацыях Украіны, ліквідацыяй наступстваў атакі займаюцца 570 ратавальнікаў і больш за 120 адзінак тэхнікі.

У Міністэрстве абароны Расіі заявілі, што ўдар "высокадакладнай зброяй" і беспілотнікамі нанесены "у адказ на тэрарыстычныя атакі кіеўскага рэжыму на грамадзянскую інфраструктуру на тэрыторыі Расіі".

На фоне атакі Узброеныя сілы Польшчы падымалі ў неба знішчальнікі. У аператыўным камандаванні войск краіны адзначылі, што мера носіць прэвентыўны характар і накіравана на забеспячэнне бяспекі паветранай прасторы.

Нагадаем, папярэдні масіраваны ракетна-дронавы ўдар па Украіне Расія нанесла 2 чэрвеня. Тады трапленні таксама прыйшліся па шматпавярховых жылых дамах у некалькіх раёнах Кіева, загінулі шэсць чалавек, 64 атрымалі параненні, уключаючы двух дзяцей. 

24 траўня пры атацы дронамі і ракетамі загінулі два чалавекі, больш за 50, уключаючы двух дзяцей, пацярпелі.