Украіна зноў ударыла па складах Wildberries, Расія атакавала пяцю ракетамі і 180 дронамі

У ноч на 24 ліпеня ўкраінскія дроны атакавалі два ключавыя лагістычныя хабы кампаніі Wildberries ў Санкт-Пецярбургу і Ленінградскай вобласці. Гэтыя склады займаюць плошчу 106 тысяч і 210 тысяч квадратных метраў.

Таксама ў Кіраве быў атакаваны завод "Авіятэк", які выпускае зенітныя кіраваныя ракеты класа "зямля — паветра", ракеты-мішэні, катапультныя крэслы для выратавання пілотаў ды інш. Ракетны ўдар па гэтым заводзе пацвердзіў прэзідэнт Украіны Уладзімір Зяленскі.

У сваю чаргу расійскія войскі атакавалі Украіну пяцю кіраванымі авіяцыйнымі ракетамі Х-59/69 і 180 дронамі, перадае hromadske.ua. Сілы супрацьпаветранай абароны Украіны абясшкодзілі чатыры ракеты Х-59/69 і 160 беспілотнікаў.

Разбурэнні і пацярпелыя ёсць у Адэскай вобласці, горадзе Ізюм на Харкаўшчыне. У Чарнігаўскай вобласці ў выніку дронавай атакі загарэўся прыватны пансіянат. У Мікалаеўскай вобласці пад ударам аказалася партовая інфраструктура, аднак людзі не пацярпелі.