Візіт Ціханоўскай у Кіеў пачаўся з наведвання магілы Марыі Зайцавай
Святлана Ціханоўская каля магілы Марыі Зайцавай / прэс-служба Ціханоўскай
25 траўня Святлана Ціханоўская пачала афіцыйны візіт у Кіеў. На вакзале яе сустрэў амбасадар па асаблівых даручэннях МЗС Украіны Яраслаў Чарнагор.
Разам з Ціханоўскай у Кіеў прыехалі ўдзельнікі яе каманды Дзяніс Кучынскі, Франак Вячорка, Валерый Мацкевіч. А таксама яе намеснік у Аб’яднаным пераходным кабінеце Павел Латушка.
Гэта першы візіт Святланы Ціханоўскай у Кіеў за ўвесь час, калі яна ачольвае беларускі дэмакратычны рух.
У Кіеве Ціханоўская выступіць на Міжнародным саміце гарадоў і рэгіёнаў, які пройдзе з удзелам прэзідэнта Украіны Уладзіміра Зяленскага і спікера Вярхоўнай Рады Украіны Руслана Стэфанчука.
Таксама ў планах — сустрэча з беларусамі Украіны.
Першым месцам, куды адправілася Святлана Ціханоўская ў Кіеве, сталі Лук'янаўскія могілкі. Там яна наведала магілу загінулай беларускай ваяркі Марыі Зайцавай, удзельніцы пратэстаў 2020 года.
"Яна для мяне сімвал не толькі барацьбы супраць дыктатуры ў Беларусі, але і ўкраінска-беларускай салідарнасці. Яна загінула як герой, была вельмі моцным, светлым, прынцыповым чалавекам", — сказала Ціханоўская.
