Ян Павел II таксама маліўся за ўлады камуністычнай Польшчы. Меркаванне

17/05/2026 - 17:12

Ян Павел II / Reuters

У Мінску падчас пратэстанцкага форуму "Фестываль надзеі" прапаведнік з ЗША Франклін Грэм заклікаў удзельнікаў памаліцца за Лукашэнку і Пуціна, а сам ён прамовіў малітву за прэзідэнта ЗША Дональда Трампа.

Гэтая падзея выклікала бурнае абмеркаванне сярод беларусаў: у сацыяльных сетках многія абураюцца гэтым заклікам, некаторыя тлумачаць, што адбылося. Абыякавых амаль няма.

Журналіст беларускай рэдакцыі Радыё Свабода Дзмітрый Гурневіч адрэагаваў на гэтыя дыскусіі.

Еўрарадыё прыводзіць яго меркаванне цалкам.

"Бачу, многім людзям не спадабалася малітва за Лукашэнку падчас “Фестывалю надзеі”. Я разумею, што большасць беларусаў або агностыкі, або атэісты, але хвіліначку... Эстэтычна гэта сапраўды выглядае так сабе, пакуль мы не захочам зразумець: малітва за ўладу — гэта не падзяка ўладзе за яе мудрасць, эфектыўнасць і дабрыню.

Я працытую самы важны фрагмент той малітвы:

“Ойча наш Нябесны, мы дзякуем Табе за гэтую выдатную магчымасць быць тут разам. Мы молімся аб прэзідэнце Лукашэнку. Мы молімся за ўсіх ва ўладзе ў гэтай краіне. Мы молімся, каб Ты вёў іх і накіроўваў іхнія крокі”, — так маліўся за Лукашэнку сам Грэм.

Нават тут мы бачым, што гэта нейтральны тэкст. Але кожны прысутны маліўся так як хацеў. Усё сваё дзяцінства, памятаю, малітву за ўладу ў касцёле ў Налібаках, дзе я вырас. Я ў жыцці не ўспрымаў яе як ухваленне ўлады. Наадварот, гэта малітва за тое, каб яны не тварылі злога. Напрыклад, у каталіцкім касцёле заўсёды моляцца за ўладу, нягледзячы на палітычны лад. І гэта зразумела. Людзі моляцца за грэшнікаў, у гэтым і ёсць сэнс малітвы.

У 1979 годзе Папа Рымскі Ян Павел ІІ упершыню наведаў Польшчу як галава каталіцкага касцёлу. Нагадаю, у краіне ужо 35 год кіравалі камуністы. Папа неаднаразова на імшах дзякаваў уладзе за магчымасць наведаць радзіму, за арганізацыю сустрэч. І… маліўся за ўладу. Думаю, што ніводнаму паляку тады не прыйшоў галаву, што Ян Павел ІІ моліцца з падзякай Богу за камуністаў.

Падчас візіту на Кубу ён маліўся за ўлады Кубы. І кіраваў там тады Фідэль Кастра. Калі папа Леў XIV, калі-небудзь наведае Беларусь, то гарантую, што ён будзе маліцца за яе ўладу, ці то Лукашэнку, Караніка, ці то Ціханоўскую, ці то Пазняка або Латушку.

І вельмі несправядлівымі выглядаюць папрокі пратэстантаў, што яны дазволілі сябе выкарыстаць такой карцінкай Грэма і дыктатара Беларусі. Вайтыла наведваў сваю радзіму ўжо пасля расстрэлаў пратэстоўцаў у Познані ў 1956 годзе, калі загінула амаль 60 пратэстоўцаў. Пасля ўдзелу польскай арміі ва ўварванні ў Чэхаславаччыну ў 1968 годзе. Пасля пратэстаў 1970, калі загінула 40 пратэстоўцаў. Таму вернікі і моляцца за ўладу, каб яна не ўчыняла дзікунстваў".