Прапаведнік Франклін Грэм у Мінску заклікаў памаліцца за Лукашэнку і Пуціна

У Мінску падчас пратэстанцкага форуму "Фестываль надзеі" галоўная зорка мерапрыемства — прапаведнік з ЗША Франклін Грэм — заклікаў удзельнікаў памаліцца за Лукашэнку і Пуціна, а сам ён прамовіў малітву за прэзідэнта ЗША Дональда Трампа.

Выступаючы перад дзесяцітысячнай аўдыторыяй на "Чыжоўка-Арэне", пастар сказаў:

"Біблія вучыць нас сёе-тое рабіць. Біблія кажа, каб мы маліліся за тых, хто пры ўладзе. У 1 Цім. 2:1–2 сказана, каб мы маліліся. Мы павінны маліцца за кіраўніцтва. Я сказаў вашаму прэзідэнту ўчора, я сказаў прэзідэнту Лукашэнку, што сёння ўвечары мы ўсе ўстанем... І я папрашу вас усіх устаць... І я хачу, каб вы ўсе ўсталі і прамовілі малітву за свайго прэзідэнта, за ўсіх, хто начальствуе. Калі вы прыехалі сюды з Расіі — маліцеся за прэзідэнта Пуціна, за тых, хто стаіць пры ўладзе ў вашай краіне; а я памалюся за свайго прэзідэнта — прэзідэнта Трампа. Але Біблія кажа нам маліцца за тых, хто знаходзіцца пры ўладзе. Таму тое, што мы цяпер зробім, — памолімся ўголас, а праз некалькі хвілін я завершу гэта сваёй малітвай", — прыводзіць яго словы канал "Хрысціянская візія: НЕ ВАЙНЕ!".

Тэкст самой малітвы Грэма такі:

"Ойча наш Нябесны, мы дзякуем Табе за гэтую цудоўную магчымасць быць тут разам. Мы молімся за прэзідэнта Лукашэнку. Мы молімся за ўсіх, хто пры ўладзе ў гэтай краіне. Мы молімся, каб Ты вёў іх і накіроўваў іх крокі. Ойча, мы дзякуем Табе за сённяшні вечар. За ўсіх, хто прысутнічае тут. Мы молімся ў імя Ісуса. Амін".

Франклін Грэм — прэзідэнт і генеральны дырэктар Евангелісцкай асацыяцыі, якая дапамагае людзям, што апынуліся ў зонах крызісаў і катастроф. Грэм з’яўляецца блізкім сябрам прэзідэнта ЗША Дональда Трампа і спецпрадстаўніка па Беларусі Джона Коўла.

Грэм праводзіць такія фестывалі па ўсім свеце, збіраючы вялізныя аўдыторыі. У Беларусь ён прыехаў упершыню.

15 мая Грэм сустрэўся з Аляксандрам Лукашэнкам. На сустрэчы прысутнічала жонка Коўла Грэта ван Састэрэн.