Загадчык кафедры ВНУ ў Горках браў хабар прадуктамі і алкаголем

У Горацкім раёне вынеслі прысуд загадчыку кафедры аграрнай ВНУ: яго прызналі вінаватым у атрыманні хабару і падбухторванні студэнтаў да яго перадачы. Суд прызначыў 5 гадоў пазбаўлення волі, буйны штраф і забарону на выкладчыцкую дзейнасць.

Паводле матэрыялаў справы, абвінавачаны адказваў за арганізацыю выніковай атэстацыі студэнтаў. У перыяд з верасня па кастрычнік 2025 года ён неаднаразова схіляў студэнтаў, у тым ліку стараст навучальных груп, да перадачы яму розных матэрыяльных каштоўнасцяў. Паводле версіі следства, гэтыя "падарункі" прызначаліся старшыні дзяржаўнай экзаменацыйнай камісіі.

За ўзнагароду мужчына абяцаў садзейнічанне ў паспяховай здачы выпускных экзаменаў. Акрамя таго, ён таксама прымаў хабар у выглядзе прадуктаў харчавання і алкагольных напояў за выстаўленне здавальняючых адзнак падчас прамежкавай атэстацыі.

У пракуратуры падкрэслілі, што ўсе атрыманыя матэрыяльныя каштоўнасці былі звязаныя з яго службовым становішчам.

Па сукупнасці злачынстваў яму прызначылі пакаранне ў выглядзе 5 гадоў пазбаўлення волі з адбываннем у папраўчай калоніі ва ўмовах узмоцненага рэжыму.

Акрамя таго, суд прызначыў штраф у памеры 500 базавых велічынь (22,5 тыс. рублёў) і забараніў на працягу 5 гадоў займаць пасады, звязаныя з выкладчыцкай дзейнасцю.