Мінчанка страціла кватэру праз махляроў

68-гадовая жыхарка Мінска стала ахвярай тэлефонных махляроў і страціла амаль 140 тысяч долараў.

Як паведамляе Тэлеграм-канал МУС Беларусі, жанчыне, якая працуе ў адной з ВНУ, у мэсенджары прыйшло галасавое паведамленне нібыта ад рэктара. У ім яе прасілі выконваць указанні супрацоўнікаў фінансавых расследаванняў.

Пасля гэтага невядомыя паведамілі мінчанцы, што яна нібыта фігуруе ў справе аб адмыванні грошай. Каб пазбегнуць праблем, ёй прапанавалі "задэклараваць" свае зберажэнні.

Спачатку жанчына пакінула каля 25 тысяч долараў у загадзя ўзгодненым месцы за горадам. Яна была ўпэўненая, што ўдзельнічае ў дыстанцыйнай інкасацыі, якую праводзіць Нацыянальны банк.

Потым махляры пераканалі яе прадаць кватэру, сцвярджаючы, што інакш нерухомасць могуць прадаць на чорным рынку. Выручаныя ад здзелкі 105 тысяч долараў яна таксама перадала злачынцам.

На гэтым патрабаванні не скончыліся. Аферысты настойвалі, каб жанчына прадала яшчэ і гараж, але атрымалі адмову. Замест гэтага яна пазычыла ў сужыцеля больш за 4 тысячы еўра і перавяла грошы на рахункі, якія ўказалі махляры.

У міліцыі нагадваюць, што супрацоўнікі праваахоўных органаў, банкаў і дзяржаўных устаноў не патрабуюць ад грамадзян "дэклараваць" зберажэнні, пераводзіць грошы на "бяспечныя рахункі" ці перадаваць наяўныя кур'ерам.