Зяленскі падзякаваў Ціханоўскай за падтрымку пасля расійскай атакі па Украіне

Уладзімір Зяленскі падзякаваў Святлане Ціханоўскай за падтрымку пасля чарговага расійскага ўдару па Украіне. Лідарка беларускіх дэмакратычных сілаў і прэзідэнт Украіны абмяняліся рэплікамі ў сацсетцы X.

У ноч на 14 траўня Расія нанесла масіраваны ўдар па Украіне, асноўнай мэтай стаў Кіеў. Было выпушчана больш за паўсотні ракет і каля 700 беспілотнікаў. Агулам з паўночы 13 траўня Расія ўжыла для атакі па Украіне больш за 1560 беспілотнікаў.

У выніку атакі ў Кіеве налічваюцца дзясяткі пацярпелых і зніклых пад заваламі. Па звестках на цяперашні час, загінулі восем чалавек, у тым ліку 12-гадовае дзіця. У іншых гарадах Украіны таксама ёсць загінулыя і пацярпелыя.

Ціханоўская ў сваім пасце ў Х напісала: "Расія чарговы раз дэманструе, што не імкнецца да міру: ракеты, беспілотнікі, разбураныя дамы і мірныя жыхары пад заваламі ў Кіеве. Украіна абараняе ўсю Еўропу ад тэрору і агрэсіі. Ёй патрэбная дадатковая падтрымка, узмоцненая супрацьпаветраная абарона і сталы ціск на Расію".

На гэта Зяленскі адказаў падзякай: "Дзякуй за вашу падтрымку! Салідарнасць мае значэнне. Важна, каб людзі ў Беларусі чулі нас і не дазволілі яшчэ глыбей уцягнуць Беларусь у гэтую расейскую вайну, якая пагражае ўсім народам рэгіёну".