У Нацбанку пракаментавалі новаўвядзенне з геалакацыяй

Беларускія банкі з 1 ліпеня абавяжуць выконваць новыя патрабаванні па зборы, захоўванні і аналізе лічбавага адбітка прылады. Пра гэта заявіў намеснік старшыні праўлення Нацбанка Андрэй Картун.

Як паведамлялася раней, гаворка ідзе ў тым ліку пра тое, што кліенты будуць аабавязаныя прадастаўляць доступ да геалакацыі гаджэта, з якога заходзяць у праграму. Намеснік старшыні Нацбанка заяўляе, што гэтыя меры павінны выявіць падазроныя дзеянні і махлярства.

У Нацбанку кажуць, што лічбавы адбітак — унікальны набор параметраў (мадэль прылады, версія праграмнага забеспячэння, наладкі браўзэра, геалакацыя ды інш.). Ён дазваляе надзейна ідэнтыфікаваць карыстальнікаў. Лічбавы адбітак фармуецца пры першым ўваходзе карыстальніка ў сістэму дыстанцыйнага абслугоўвання. Махляры не змогуць правесці аплату, скраўшы пароль, уці ўвайсці ў сістэму, падмяніўшы геалакацыю.

Пры гэтым колькасць прыладаў не абмежаваная, і такіх адбіткаў можа быць некалькі.

Андрэй Картун кажа, што банкі і раней укаранялі доступ да геалакацыі, але гэт было добраахвотна, а цяпер стане абавязкова. "Як гэта будзе выглядаць? Напрыклад, вы ўвесь час жывяце ў Мінску, заходзіце са сваёй прылады — адпаведна, у сістэмы гэта не выклікае ніякіх падазрэнняў. Але калі раптам вы заходзіце з нейкай іншай прылады, незнаёмай у сістэме, ды яшчэ з іншай краіны або з нейкага іншага горада, то сістэма чырвоную лінію акрэсліць, і адпаведныя службы бяспекі банка будуць адпрацоўваць пытанне. Яны як мінімум затэлефануюць вам і спытаюць, гэта вы ці не вы", — тлумачыць прадстаўнік Нацбанка.

Ён запэўнівае, што інфармацыя выкарыстоўваецца толькі для бяспекі і яе ўцечка для рэкламных ці камерцыйных мэтаў немагчымая.

Раней "Альфа-Банк" папярэдзіў кліентаў, што з 26 траўня пры ўваходзе ў мабільны дадатак банка ў кліентаў запатрабуюць доступ да геалакацыі.