16-гадовая беларуска стала ўдзельніцай дарослага чэмпіянату па шахматах у Польшчы

16-гадовая беларуска Настасся Обухава выйграла чэмпіянат Польшчы па шахматах сярод моладзі да 20 гадоў. На дарослым індывідуальным чэмпіянаце ў Варшаве яна стала самай маладой удзельніцай.

У рэйтынгу спартоўцаў Обухава займае толькі 47-е месца. Аднак перамога на юнацкім чэмпіянаце дазволіла ёй трапіць у дзясятку ўдзельніц дарослага чэмпіянату Польшчы.

"Мы прыехалі ў 2022 годзе, таму што сітуацыя ў краіне станавілася ўсё больш складанай і менш прадказальнай", — цытуе польскі партал Onet словы шахматысткі.

Дзяўчына кажа, што яе сям'я жыла недалёка ад Гродна, і раней яна ўжо бывала ў Польшчы. Дарэчы, у Беларусі Настасся была медалісткай юніёрскага чэмпіянату краіны па хуткіх шахматах.

Пасля прыезду ў Польшчу бацькі аддалі яе ў школу, дзе дзейнічае адзін з найлепшых шахматных клубаў краіны — Muks Stodek.

"У Польшчы значна больш магчымасцяў і палепшаная сістэма навучання. У Беларусі ў мяне быў клуб, але калі б не дзядзька-шахматыст узроўню каля 2100 ФІДЭ, я б ніколі не зацікавілася шахматамі", — прызнаецца дзяўчына.

Цяпер яна не ходзіць у школу і навучаецца паводле сістэмы індывідуальнай адукацыі. "Школа заўсёды была для мяне занадта маруднай. Цяпер я магу рабіць гэта сама і вучыцца нашмат хутчэй. Дзякуючы гэтаму ў мяне больш часу на трэніроўкі", — тлумачыць беларуска.

У чэмпіянаце Польшчы Обухава заняла апошняе месца, але здолела згуляць унічыю з дзейнай чэмпіёнкай Клаўдыяй Кулон.